Бес дамахдачни муаллимри чпи тарс гайи аялри чешнелудаказ, хъсан къиметар аваз школаяр акьалтIарайла, гьелбетда дамахда. Алай йисуз райондин школаяр куьтягьай 687 аялдикай 48 аялди лап хъсан къиметар аваз акьалтIарна.
Алатай гьафтеда «Сулейман-Стальский район» муниципальный райондин Кьил Н. Ш. Абдулмуталибова абур райадминистрацияда кьабулна, аттестатар шад гьалара вахкана.
И шад мярекат РОО-дин начальник Османова Индира Гьажибалаевнади ачухна, аялриз хьанвай агалкьунар мубаракна, къенлай кьулухъни абуру мадни еке агалкьунар къазанмишдайдахъ вич инанмиш тирди лагьана ва гаф Нариман Шамсудинович Абдулмуталибоваз гана.
- За аялриз, абурун диде-бубайриз ва чирвилерни тербия гайи муаллимриз и агалкьун депутатрин Собранидин, райондин администрациядин ва кьилди жуван патай мубаракзава. Квехъ бахтлу гележег, кIелунра, кIвалахда, спортда мадни еке агалкьунар хьурай, - лагьана ада.
- Сад тир государстводин экзаменар куьне вирида вахкана, 90 баллар къачунвай аяларни ава. Квехъ авай куь экуь умудар гьич садрани квевай къакъат тавурай.
Квекай хъсан пешекарар хьана чи райондиз кIвалахал хкведайбур хьуй. За и еке агалкьун куьн диде-бубайриз, муаллимризни мубаракзава. Чи аялар виридалайни хъсанбур я. Къуй куь гележег бахтлуди хьурай! – лагьана Нариман Шамсудинович Абдулмуталибова.
Выпускникриз тебрикдин келимаяр райондин администрациядин Кьилин сад лагьай заместитель Л. А. Оруджевани лагьана. - Квекай хъсан пешекарар хьуй, абурухъ чун гьамиша муьгьтеж я, - лагьана ада вичин рахунрин эхирдай.
Диде-бубайрин патай Зейнудинова Гьаният Загьировна рахана. - Къе за еке шадвал ийизва. Зи аялди медаль къачузва. Квез вири аялриз бахт хьуй! Къуй чи райондихъ куьн хьтин берекат квай аялар бул хьурай! – лагьана ада.
Кьасумхуьруьн 1-нумрадин СОШ-дин выпускница Ягъибегова Беневшади чпиз хуш келимаяр лугьунай Н. Ш. Абдулмуталибоваз, классдин руководитель Назифа Исмаиловнадиз, чирвилер гайи вири муаллимриз чухсагъул лагьана ва чеб райондин тIвар вине кьаз чалишмиш жедайдахъ инанмишарна.
Гуьгъуьнлай Н. Ш. Абдулмуталибова хъсан къиметар аваз школаяр акьалтIарай 48 аялдив аттестатар вахкана, абуруз «Шарвили» ктабар багъишна.
Гьуьрметлу выпускникар, квез чIехибурун уьмуьрдиз сифте кам къачун мубаракрай. Къуй куь гележег экуьди, бахтлуди хьурай!
Асият Мусаева
