Хуьруьн жемятдин сходдал.
Райондин хуьрера терроризмдиз чпин аксивал къалурзавай агьалийрин сходар кьиле физва. 3-июлдиз Агъа СтIалрин юкьван школадин актовый залда «сельсовет Ашагастальский» хуьруьн поселенидин агьалийрин сход хьана.
И мярекатда муниципальный райондин Кьил Н. Ш. Абдулмуталибова, райадминистрациядин кьилин 1-заместитель Л. А. Оруджева, райондин общественный организацийрин руководителри, динэгьлийри, хуьруьн поселенидин администрациядин, образованидин идарайрин работникри, СМИ-рин векилри, Агъа СтIалрин ва Агъа СтIал къазмайрин хуьрерин агьалийри иштиракна.
Адан иштиракчияр «сельсовет Ашагастальский» хуьруьн поселенидин сергьятда терроризмдихъ ва диндин экстремизмдихъ галаз женг чIугунин жигьетдай профилактикадин кIвалах гужлу авунин ва хуьруьн мискIиндин имам хкягъунин месэлайриз килигна.
Райондин ва гьакIни хуьруьн поселенидин сергьятда экстремизмдин гьерекатар майдандиз акъатун хуьруьн поселенидин кьил Н. Абдурагьманова, зегьметдин ветеран М. Небиева, «Ашагастальское» ООО-дин директор И. Ибрамхалилова, школадин директор А. Бабаева, райондин Общественный палатадин председатель А. Мейланова, райондин Агъсакъалрин Советдин председатель Ф.Османова, Агъа СтIал къазмайрин мискIиндин имам М. Ибрагьимова, хуьруьн агьалияр тир И. Къурбанмегьамедова, С. Султановади, К. Мегьамедова ва масабуру векъидаказ негь авуна, адан аксина вири къуватар сад авуниз эвер гана.
Муниципальный райондин Кьил Нариман Шамсудинович Абдулмуталибова вичин рахунра райондин сергьятда диндин экстремизмдин ва терроризмдин аксина профилактикадин кIвалах гужлу авун важиблу месэлайрикай сад тирди къейдна ва и жигьетдай райондин къайдаяр хуьдай органрин работникри, терроризмдиз акси комиссияди, общественный тешкилатри еке кIвалах тухузвайди лагьана.
Эгер чна и жигьетдай чи вири къуватар сад авуна, са макьсаддихъ рекье тунвай профилактикадин кIвалах тухвайтIа, - давамарна ада, - нетижаяр умудлубур жеда. Вичин рахунрин эхирдай Н. Ш. Абдулмуталибова хуьруьн ва райондин агьалийриз, общественный организацийриз, образованидин идарайрин работникриз виринра виниз тир дережада аваз терроризмдин идеологиядиз акси акъвазунин, диндин рекьяй савадсузвилихъ галаз женг чIугунин карда кIвалах мадни гужлу авуниз, чи гележлег тир акьалтзавай несилдин патахъай жавабдарвал дериндай гьисс авуниз эвер гана.
Сходдал ачух сесер гуналди Агъа СтIалрин хуьруьн мискIиндин имамвиле и хуьруьнви динэгьли Талиб Бейбалаев хкяна.
