Гьуьрметлу «Куьредин хабарар» газетдин редакция! За квез и чар жув яшамиш жезвай куьчедин агьалийрин тIалабуналди кхьизва.
Мукьвара чна «сельсовет Касумкентский» хуьруьн поселенидин кьилин заместитель Фазил Мамедьярова Кьасумхуьруьн телевиденидай авур рахунрихъ яб акална. Ада поселенида алатай йисуз социальный рекьерай авур кIвалахрикай ва вилик акъвазнавай везифайрикай суьгьбетна.
Лагьана кIанда, эхиримжи вахтара райондин центрдал аваданламишунин, агьалийрин игьтияжар таъминарунин рекьерай еке кIвалах тухванва. И карда, гьелбетда, хуьруьн поселенидин кьилин къуллугъдал тайинарнавай Мурад Бейдуллаеван зегьмет ва чалишмишвилер гзаф я.
Кьасумхуьруьн юкьван са шумуд куьчеда яшамиш жезвай агьалийриз дигидай цикай дарвал аваз гзаф йисар тир. Себебни чиликай тухванвай дигидай цин къанал кьарадай, зирзибилдай ацIанваз хьун тир. Хуьруьн поселенидин администрациядин регьбервилик кваз анаг михьна, къайдадиз гъана, агьалияр дигидай целди таъминарна.
Идалайни гъейри, цIийи куьчейриз херхем вегьена, эквер тухвана, маса хейлин кIвалахар авуна.
Ихьтин кIвалахар авунай, агьалийрин гьакъиндай къайгъу чIугунай чна поселенидин администрациядиз чухсагъул лугьузва.
А. Абдулкъафаров, пенсионер.(Чарчел мад 17 касдин къулар ала).
