И йикъара муниципальный райондин Кьил Абдулмуталибов Нариман Шамсудиновича райадминистрациядин ва гьакIни чи райондин сергьятда авай республикадин са жерге къуллугърин руководителрихъ галаз вичин рабочий кабинетда совещание тухвана.
Анал вич Эминхуьре яшамиш жезвай 5 аялдин диде Абдулагъаева Бесхалум Сердеровнадин арзайрихъ яб акална. Ада инвалидарни авай вичин чIехи хзан бажармишун, гьукуматдин патай абуруз авай кьезилвилерикай менфят къачун, инвалидвал тайинарун, герек маса документар туькIуьрун, кIвалахдал акъвазун ва я биржадик (ЦЗН) экечIун в патал гьар са идарадин тIвар кьаз ва абуру вичивай тIалабай ришветрин кьадарарни лугьуз, наразивилин арзаяр авуна ва и кар себеб яз вич, райондилай кам яна, виниз тир къуллугъриз арзаяр кхьиниз мажбур хьайиди къейдна.
Анал гьар къуллугърин руководителри чпиз а ришветрикай хабар авачирди къейдна ва ахьтин дуьшуьшра а работникрилай кхьенвай арза гваз чпин патав атун герек тирди лагьана.
- ЦIай авачир чкада гум жедайди туш, - лагьана эхирдай анал рахай райондин Кьил Н. Ш. Абдулмуталибова. – Талукь къуллугъри чпин хивевай везифаяр истемишзавайвал кьиле тухун тийизвайвиляй ва арзайриз вахтундамаз килиг тийизвайвиляй арзачияр республикадин ва адалайни вине авай гьукуматдин чIехи органриз, министерствойриз арзаяр кхьиниз мажбур жезва. Райадминистрациядин вилик квай арзаяр вегьедай ящик ичIи я. Чун са миллет я. И алай четин девирда чна дардавайдакай хабар кьун, куьмекдин гъил яргъи авун герек я, иллаки алай мусурман патал пак тир Рамазандин вацра.
Эхирдай Н. Ш. Абдулмуталибова, талукь тир къуллугърин руководителриз кIвалахда къайда тун, арзачийрин арзайриз чкадал килигун тагькимарна.
