«Сулейман-Стальский районда 2014-2020-йисара багъманчивал вилик тухун» муниципальный программа кьабулуни ва кардик акатуни вичин хъсан нетижа гузвайди ашкара я. Алатай йисуз районда 15375 тонн емишар кIватI хъувуни ва 65 гектарда цIийи багълар кутуни и кардин патахъай шагьидвал ийизва.
2014-йисуз Вини СтIалрин хуьруьн мулкуна «Члар» ООО-ди 60 гектарда промышленный багълар кутуналди, инвестиционный проектдин сифтегьан пай кьилиз акъудна. Вичин сметадин къимет 24437 агъзур манат тир и проектдиз тешпигьди мад республикада авач.
Багъманчивал вилик тухуник «Ашагастальский» ЗАО-ди (66 га), «Бабаев Н. М.» КФХ-ди (27 га), «Уражай» ООО-ди (6 га), арендаторар тир Г. Насруллаева (Агъа СтIал, 20 га), М. Мегьамедова (Кьулан СтIал, 4,6 га), Н. Садикьиди (Агъа СтIал къазмаяр, 3 га), Ф. Агъаханова (НуьцIуьгъ, 4 га), Т. Батманова (Эминхуьр, 7 га) ва масабуру еке пай кутазва.
Программадин бинедаллаз алай йисуз 72 гектарда, санлай 2020-йисалди 651 гектарда цIийи багълар кутун, кIватI хъийизвай емишрин кьадар 24500 тонндив агакьарун планламишнава.
Алай вахтунда райондин хуьруьн майишатдин карханайрихъ, арендаторрихъ ва агьалийрихъ 3184 гектар багълар ава. Абурукай 2050 гектар бегьердал атанвайбур, амайбур жегьил багълар я.
Райондин хуьруьн майишатдин отделдин начальник М. Бабаева чаз лагьайвал, багъларай неинки емишар кIватI хъийизва, гьакIни общественный ва хсуси мал-къара патал алафарни гьазурзава. Районда кIватIзавай алафдин 80 процент багъларал ацалтзава. ГьакI хьайила багъманчивал гзаф менфятлу, къазанжияр къачуз жедай хел я.
Текст кхьейди ва шикил ягъайди Хазран Кьасумов я.
