Алатай гьафтеда «Сулейман-Стальский район» муниципальный райондин администрациядин заседанийрин залда Общественный палатадин совещание кьиле фена. Тешкиллувилин месэлайриз килигай совещанидин кIвалахда муниципальный райондин Кьил Нариман Шамсудинович Абдулмуталибова, Общественный палатадин членри, хуьрерин поселенийрин кьилери, общественный тешкилатрин, районда кардик квай республиканский ва муниципальный къуллугърин руководителри, чкадин массовый информациядин такьатрин векилри иштиракна.
Районда кардик кваз хьайи Общественный советдин чкадал цIийиз тешкитлнавай Общественный палатадин членар яз анал образованидин учрежденийрин, хуьрерин общественный тешкилатрин векилар тир 11 кас хкягъ хъувуна.
Муниципальный райондин Кьил Нариман Шамсудинович Абдулмуталибова, Общественный палатадин членар тир Мусаиб Агьмедова, Фахрудин Османова теклиф гъуналди палатадин председателвиле Алимет Мейланов, адан заместителарвиле Ягъибег Ягъибегов, Феликс Магьмудов, палатадин секретарвиле Загьир Гьажимирзоев хкяна.
Совещанидал палатада гьамиша кардик кваз жедай экономикадин, социальный рекьерай вилик фидай, законодательствойрал амал авунал гуьзчивал тухудай ва спортдинни физкультурадин месэлайрай комиссияр тешкилна, абурун председателар яз Рудин Абакаров, мусаиб Агьмедов, Юрий Таривердиев ва Малик Тагьирбегов хкяна.
- Заз сифте нубатда къейд ийиз кIанзава хьи, райондин Общественный палатадин членрин арада чпиз хуьре-кIвале гьуьрмет, авторитет авай, яргъал йисара райондин администрацияда, маса организацийра, карханайра жавабдар къуллугърал кIвалах авур ксар ава, - къейдна вичин рахунра Н. Ш. Абдулмуталибова. – Зун кIевелай инанмиш я хьи, абурун куьмекдалди чавай райондин экономика мягькемариз, социальный ва вилик акъвазнавай важиблу маса месэлаяр гьялиз жеда.
Общественный палатадин председатель Алимет Мейланова вичиз ихтибар авунай Нариман Шамсудинович Абдулмуталибоваз ва палатадин членриз чухсагъул лагьана, ам тешкилатдин вилик акъвазнавай месэлайрални гегьеншдиз акъвазна.
- Гьелбетда, райондин руководстводин вилик экономикадин, социальный ва маса рекьерай еке везифаяр акъвазнава, - лагьана А. Мейланова. – Заз райондин руководство инанмишариз кIанзава хьи, абур кьилиз акъудуник Общественный палатадин членри чпин пай кутада. Алай вахтунда вилик акъвазнавай кьилин месэла, зи фикирдалди, терроризмдихъ ва экстремизмдихъ галаз женг чIугунихъ галаз алакъалуди я. Палатадин членрин арада уьмуьрдин уькIуь-цуру акунвай, жавабдар къуллугърал кIвалах авур, чпиз районда гьуьрмет авай инсанар-агъсакъалар гзаф ава. Терроризм лугьудай завалдин вилик пад кьунин, районэгьлийрин арада меслятвал артухарунин карда абур вилик жергейра жеда.
Хазран Кьасумов я.
