30-июндиз КIварчагърин хуьруьн жемятдин инициативадалди ина хцидаказ акъвазнавай хъвадай цин месэладиз талукьарнавай хуьруьн сход кьиле фена. Ана райадминистрациядин Кьилин 1-заместитель Лацис Оруджева, АС-дин ва ЖКХ-дин отделдин начальник Мустафа Мустафаева, хуьруьн Собранидин депутатри, общественный тешкилатрин ва СМИ-рин векилри иштиракна.
Сход кьиле тухузвайди тир «сельсовет Карчагский» хуьруьн поселенидин администрациядин кьил Асланбег Сефибегова хуьре хъвадай цин жигьетдай арадал атанвай четин гьалдикай, мумкинвилерикай ва гележегдин планрикай куьрелди лагьана ва сифте гаф Л. А. Оруджеваз гана.
Вичин рахунра ада хъвадай цин месэла КIварчагъа гьеле алатай асирдин 80-йисарилай хцидаказ акъвазнавайди къейдна. – Алай вахтунда хуьре хзанрин кьадар 220-далай 460 дал кьван артух хьанва, идахъ галаз санал – агьалийрин игьтияжарни, - давамарна ада. – Хъвадай цин турбаяр куьгьне хьунихъ, алай гатун еке чимивилерихъ галазни алакъалу яз турбайра ядни тIимил хьанва. Ихьтин гьал Кьасумхуьрел, НуьцIуьгъа, Герейханован хуьре ва маса хуьрерани ава. И рекьериз харждай пулунин такьатар авачтIани, райондин руководстводи и четин гьалдай экъечIдай рекьер жагъурзава: райондин ва хуьруьн поселенидин бюджетрай жедай кьадар такьатар чара ийизва, инвесторар желбзава. Алай вахтунда чун, вири къуватар сад авуна, и четин гьалдай экъечIун герек я. «Сардархуьр-ДаркIушкъазмаяр» водовод кардик акатайла хъвадай ва дигидай цин месэла тамамвилелди гьялиз жеда.
Анал рахай хуьруьн агьалияр тир Насир Къурбанова, Зейнуллагь Наврузова, Нейрудин Абдулмежидова, Абас Абасова, Мирзебала Загьирбегова, Къурбанмегьамед Къурбанмегьамедова ва масабуру, гьакIни хуьруьн Собранидин депутатар тир Тамамат Алдербеговади ва Межид Межидова, эгер райондин патай тайин куьмек гайитIа, чеб, хуьруьн поселенидин администрацияни и кардик чпин пайни кутаз гьазур тирди къейдна.
Сходдин иштиракчийри и мукьвал йикъара чеб хъвадай цин чешнедилай эгечIна алай четин гьалдай экъечIун патал кIвалахдив эгечIдайди лагьана.
Эхирдай анал рахай Л. А. Оруджева, хъвадай цин месэладихъ галаз санал, сходдал къарагъарай амай вири хци месэлаярни райадминистрациядин гуьзчивилик жедайди ва акакьдай куьмекарни гудайди къейдна.
(Чи корр.)
