Алай йисан гад кьадарсуз чимиди хьун, булахрин чешнейрани хъвадай цин кьадар тIимил хьун, гьа са вахтунда агьалийрин ихьтияжар хъвадай цин патахъай къвердавай артух хьун себеб яз хуьрерин агьалийрин патай райондин администрациядиз гзаф кьадар наразивилин арзаяр къвезва.
И йикъара и жигьетдай Кьасумхуьруьн ЦIийи поселокда авай Социалистическая тIвар алай куьчеда яшамиш жезвай агьалийрилай атанвай арзадиз чкадал килигун патал аниз, талукь тир къуллугърин руководителар, жавабдар работникар, общественностдин ва СМИ-дин векиларни галаз, райадминистрациядин Кьилин 1-заместитель Л. А. Оруджев фена. Чкадал анин агьалийрин кIватI хьун (сход) кьиле фена.
Арзайрихъ яб акалайдалай ва талукь тир ахтармишунар авурдалай гуьгъуьниз малум хьайивал, и куьчеда яшамиш жезвай 30 хзандикай са паюниз хъвадай яд авач.
- Хъвадай цикай еке кьитвал Кьасумхуьрел, Курхуьрел, КIварчагъа, НуьцIуьгъа ва маса хуьрерани ава, - лагьана анал рахай Лацис Абидинович Оруджева. – И кардин кьилин себебрикайни сад агьалийрин патай авай игьтияж са шумуд сеферда артух хьун, са шумуд цIуд йисарин вилик, чебни куьчейрал кранар эцигун патал, тухванвай турбайравай цивай авай игьтияжар таъминариз тахьун я. Гзафбуру лагьайтIа, хъвадай яд дигидай цин чкадални ишлемишзава. Хъвадай цив кьенятлувилелди эгечIна кIанда.
Гьелбетда, «Сардархуьр-Дар-кIушкъазмаяр» водовод кардик акатайла хъвадай ва дигидай цин месэла чи районда тамамвилелди гьялиз жеда, - лагьана ада вичин рахунрин эхирдай. – Алай хъвадай цикай дар вахтунда, са хзан хьиз, са куьчеда яшамиш жезвайбуру сада-садакай хабар кьун герек я. Сад кранда яд авачиз, сада салаз хъвадай яд гун – им эсиллагь дуьз кIвалах туш, дигидай яд вацIара ва къубуйра бул я, фена а яд хвала туна, гзафбуруз зурба азият яз аквазвай хьтинди я.
Сходдал гьакI хъвадай цин цIийи турбаяр кутунин, райондин сергьятда авай коммерческий организацийра цин счетчикар эцигунин, ихтияр авачиз цин линийрикай менфят къачузвайбур административный жавабдарвилиз чIугунин ва са жерге маса теклифарни гъана.
(Чи корр.)
