29-июндиз муниципальный райондин администрациядин нубатдин заседание хьана. Ам райадминистрациядин Кьил Мегьамедханов Штибег Гьажимегьамедовича кьиле тухвана.
Засединидин кIвалахда адмиинистрациядин кьилин заместителри, хуьрерин поселенийрин кьилери, райадминистрациядин отделрин начальникри, ведомствойрин ва къурулушдин хилерин руководителри, гьакIни общественностдин ва СМИ-рин векилри иштиракна.
Анал муниципальный равйондин сергьятда хуьруьн майишатдин метлеб авай чилерин государстводин хсусиятвал чара авунин жигьетдай авай гьалдин ва кьабулзавай серенжемрин гьакъиндай месэладиз килигна.
И месэладай анал гегьенш доклад гваз «Муниципальный эменнидин ва чиликай менфят къачунин управление» МБУ-дин директор Рамазан Бабаев рахана. Ада къейд авурвал, 2010-йисуз управлениди муниципалитетдин хсусиятдиз 5188 гектар чилерин участокар къачунин гьакъиндай 81 постановление акъудна, и чилерин участокар кадастровый учетдал эцигна ва муниципальный райондин ихтиярдиз вугун регистрация авуна.
2014 ва 2015-йисара депутатрин Собраниди 2013-йисан 22-июлдиз 139-нумрадик кваз, 2014-йисан 17-августдиз 231-нумрадик кваз кьабулай къараррин бинедаллаз и чилер талукь тир хуьрерин поселенийрин хсусиятдиз вахканва. А къараррин бинедаллаз цIийиз тешкилнавай чилерни гележегда абур дуьз ишлемишун патал хуьрерин поселенийрин хсусиятдиз вахкуда.
Къенин йикъалди, - давамарна докладчиди, - 16450 гектар умуми майданрин 543 чилин участок хуьрерин поселенийрин хсусиятдиз вахканва.
Докладчи и месэладай гьалтзавай са жерге четинвилерални акъвазна ва абур ачухарна.
2014 ва 2015-йисара, - къейдна ада, - хуьрерин поселенийрин администрацийри рекьерик акатзавай ва гзаф квартирайрин кIвалерин кIаник квай чилерин участкайрин ихтиярар регистрация авунин жигьетдайни еке кIвалах тухузва. Хуьрерин чилерин категориядик акатзавай вишелай виниз чилин участокар кадастровый учетдиз къачунва.
И месэладай анал чпин фикирар гваз райадминистрациядин кьилин сад лагьай заместитель Лацис Оруджев, Эминхуьруьн поселенидин администрациядин кьил Рамазан Рамазанов, «УМиЗ» МБУ-дин директордин заместитель Назир Гьасанов ва маса юлдашар рахана.
Заседанидал гьялай месэладай талукь къарар кьабулна.
Эхирдай Ш. Гь. Мегьамедханова адан к1валахдин нетижаяр кьуна.
