«Сулейман-Стальский район» муниципальный райондин Кьил Нариман Шамсудинович Абдулмуталибова и йикъара 1986-йисуз Чернобылдин АЭС-дал кьиле фейи авариядин нетижаяр арадай акъудуник вичин пай кутур кьуланстIалви Гьабибулагь Расулов ва адан хзан кьабулна, адав 2011-2015-йисарин федеральный тайин метлебдин «Жилище» программадин бинедаллаз яшайишдин сертификат вахкана.
- Гьелбетда, Чернобылдин АЭС-дал кьиле фейи аварияди халкьдиз еке бедбахтвилер гъана, - лагьана Н. Ш. Абдулмуталибова. – Адан чIуру нетижаяр арадай акъудуник гьа четин макъамда вишералди инсанри чпин пай кутуна, гьа идалди абуру халис ватанпересвал, кьегьалвал къалурна. Абурун арада 37 кас чи райондин агьалиярни авай. Гьукуматди «чернобылвийрин» гьакъиндай кьетIен къайгъударвал ийизва. Федеральный дережада тайин метлебдин «Жилище» программа кьабулун ва кардик акатун и кардин шагьид я. Программадин бинедаллаз, гьакIни ДР-дин Гьукуматдин, зегьметдинни социальный жигьетдай вилик финин министерстводин, чкадин самоуправленидин органрин чалишмишвал себеб яз, райондай 29 касдив яшайишдин сертификатар вахканва, къе сертификат Гьабибулагь Расуловав вахкана. Райондин Собранидин депутатрин, администрациядин ва кьилдин жуван патай за адаз сертификат вахкун мубаракзава ва адахъ мягькем сагъламвал, яшайишда вири къулайвилер хьун кIанзава.
-Чернобылдин АЭС-дал бедбахтвилин кIвалах хьайила, офицер, ватанперес яз, завай секиндиз ацукьиз хьанач, зун гуьгьуьллувилелди авариядин нетижаяр арадай акъудиз фена, - лагьана Гь. Расулова. – И кардал за дамахни ийизва. Сертификат вахкунайни за Гьукуматдиз, муниципальный райондин Кьил Нариман Шамсудинович Абдулмуталибоваз чухсагъул лугьузва.
Гьабибулагь Расуловав яшайишдин сертификат вахкунихъ галаз алакъалу яз гуьруьшдал тебрикдин келимаяр райондин администрациядин кьилин 1-заместитель Лацис Оруджева ва маса юлдашри лагьана.
Хазран Кьасумов
Шикилда: Н. Ш. Абдулмуталибова Расуловрин хзан кьабулнава.
