Тамун гапIалар, зулар, там-тар авай чкаяр гуьрчег аквазвайди, абуру тIебиат гуьрчегарзавайди, инсанрин сагъламвал мягькемарзавайди виридаз чизва. Бес чун тIебиатдив гьикI эгечIзава? Чаз адан къадир авани?
…Гьар сеферда, Эминхуьряй Кьасумхуьрел кIвалахал къвез-хъфидайла, за Советский хуьруьн кьилихъай Герейханован хуьруьн кIанихъ кьван шегьре рекьин кьве патани авай тамун зулариз, мадни дуьз лугьун хьайитIа, анагар куьлягьсуз хьанвай гьалдиз фикир гузва. Рекьин кIаник пата амайди бегьем хел-затI аламачир, саки кьуранвай сад-кьве тар я.
Рекьин винел пата авай тамун зулни, къе хьиз яб тагуз, гелкъведай кас авачиз амукьайтIа, сад-вад йисалай михьиз терг жеда. Анани гзаф тарар кьуранва, кIевир тавунвай анриз малари, лапагрини екез зиянар гузва.
Виликдай и зуларин яргъивал 2000-2200 метр тир. Тарар кьурана, зуларин хейлин майданар хкатнава. Чаз акурвал, и кардин себебрикай сад аниз яд къведай къанал тахьун я. Виликдай авай къанал къе чирни хъижезмач.
Гьич тахьайтIа, тамун зуларихъ школьникривай хьайитIани гелкъвез жедачни?
Районрин уртах тIебиат хуьнин комитетдин, Герейханован хуьруьн поселенидин векилриз тамун зулар авай гьал аквазвач жал?
Тамун зулариз инсанри кьунвай инад акурла, зи рикIяй «Чун къадирсузар я» лагьай хиял физва.
Хазран Кьасумов
