Алай йисан 1-ноябрдиз Дербент шегьерда педагогический колледждин 90-йис тамам хьуниз талукьарнавай чIехи мярекат кьиле фида.
Чи райондин саки вири хуьрерин школайра педколледждин гзаф выпускникри гьакъисагъвилелди зегьмет чIугвазва. Чи райондайни и мярекатда чIехи делегацияди иштиракда.
Педколледждин коллективдиз и лишанлу югъ тебрик авунин мураддалди чаз агъадихъ Шагьабудин Шабатован шиир гуз кIанзава.
Педагогвилин колледж Дербентдин
Педагогвилин колледж Дербентдин,
Вал дамах тийир авач са касни.
Вун машгьур хьанва михьиз
уьлкведиз,
А гьуьрметар ваз язва къе хасни.
Ватандин ЧIехи дяведин чIавуз
Картариз ухшар, гуьзел тир рушар,
Акъвазначир кьве вил ягъна къавуз,
Чирнай душмандиз чеб тиртIа вужар.
Тербияламиш авур игитар,
Гьам женгининни, гьамни зегьметдин.
Къазанмиш авур пара гьуьрметар,
Иеси хьанвай руьгьдин девлетдин.
Халкьдин векилар къене рикI авай,
Гьукумдарарни уьлкведиз машгьур,
Вун бине язва абруз виридаз,
Баркалла алай ихьтин кар авур.
Гьикьван муаллимриз, гьикьван
алимриз,
Хьанва вакай къе лап хайи тир кIвал.
Са касни физвач, лугьун авайвал,
Акур чIавуз вун, ягъиз чпин къвал.
Ватанпересвал, инсанпересвал,
Тупламиш авур чирвилералди.
ГьикI ийидач лагь вал за гьейранвал,
Аквазвайла заз къе вилералди.
Вун чи сабур я, вун я чи абур,
Педагогвилин колледж Дербентдин.
Къадир ава чаз, лугьузва за ваз,
Вуна чIугвазвай гьахълу зегьметдин.
Агалкьунар вахъ мадни хьуй пара,
Йигиндиз къачу виликди камар!
Им тирвиляй къе чи кьведан ара,
За экIгъда ви кIвачерик гамар.
90 йис, и баркаллу рехъ,
Гьалнавай камар камуна аваз.
Лагь кван вуна заз, муьгьтеж я вун
квехъ?
Ашукь я чун вал, жегьилдиз акваз.
Педагогвилин колледж Дербентдин,
Илимдин бине кутур сифтеди.
Ви ракIарар чаз садрани такуй,
Агал авунваз кIеви чефтеди.
Чи лезги хци - Гьажиагьмеда,
Регьбервал гайи 43 (йи)суз.
Аник акатай гьар са яалдин,
Диде-буба, куьн архайин ксус.
ЧIехи коллектив тупламиш хьанвай,
Акъваз тавуна чIугвазвай зегьмет.
Бахт тушни ам чаз Аллагьди ганвай,
Чун буржлу я квез авуниз гьуьрмет.
Педагогвилин колледж Дербентдин,
Навигатор хьиз авазва кIвенкIве.
Таъминарзавай муаллимралди,
Хайи Лезгистан ва гьакIни уьлкве.
Гьикьван михьивал, къайдани низам,
Аваз, кIвалахар ийизва тамам.
Гьейран жезва вал акур гьар са кас,
Адетар авай анжах са ваз хас.
Педагогвилин колледж Дербентдин,
Ракъурзавай гьар са югъ тарихдиз.
Анжах гьакI алад, гележегдани,
Гьа фейи саягъ, твах жув лайихдиз.
Макьай тир шаир Шагьабудиназ,
Тарифар авун хьайи кар туш хас.
Гьейран хьайила а крарал ви,
Дамарра, валлагь, ргана иви.
