Россиядин Федерациядин вири шегьерра, районра хьиз, 1-сентябрдилай чи райондани зулун призыв башламишнава.
И кIвалах гьикI кьиле физватIа чирун патал чун и йикъара ДР-дин военный комиссариатдин Сулейман-Стальский отделдин начальник подполковник Женетов Рейзудин Сейфуллаевичан патав фена ва адавай са шумуд суалдиз жаваб гун тIалабна.
- Рейзудин Сейфуллаевич, алай вахтунда Куьне регьбервал гузвай чи райондин отделда зулун призыв гьикI кьиле физва?
2013-йисан 2-июлдиз кьабулнавай РФ-дин 170-ФЗ-нумрадин закондин бинедаллаз государственный ва муниципальный къуллугъра са шумуд дегишвал тунва. 1-сентябрдилай чи уьлкведа жегьилар армиядин жергейриз къуллугъ ийиз рекье тунин зулун призыв башламиш хьанва. Чи райондани жегьилар гьакъикъи военный къуллугъ ийиз армиядиз рекье тун патал кIвалах тухунин жавабдарвал чкайрал тешкилнавай призывной комиссийрин хиве тунва. Чи отделдани «Сулейман-Стальский район» МО-дин администрациядин Кьил Мегьамедханов Штибег Гьажимегьамедович председатель яз призывной комиссия тешкилнава. Адан составдик РОВД-дин, РУО-дин, ЦЗН-дин, райондин агъсакъалрин Советдин ва маса тешкилатрин векилар ква.
Идахъ галаз сад хьиз, ЦРБ-дин кьилин духтурдин заместитель Фаталиев Мегьамедбег Абдулфатахович кьиле аваз призывникрин сагъламвал ахтармишдай ва талукь къарар кьабулдай медкомиссияни тешкилнава ва кардик ква. И кIвалах кьиле тухун патал графикар туькIуьрна, жавабдар ксар тайинарнава.
- Эгер сир туштIа, чаз алай вахтунда Россиядин армиядиз вужар ва гьихьтин жаванар тухузватIа лагьана кIанзавай ва Дагъустандай, Кавказдай абур вучиз тIимил тухузва?
- Сифте нубатда чна армиядиз тухузвайбур чпихъ мягькем сагъламвал авай, яш тамам хьанвай, кьилин учебный заведенияр куьтягьнавай ва я военкоматдай ДОСААФ-дин школайра кIелай жаванар я, гьабурни тайин кьадар. Вучиз лагьайтIа, СССР авайла адан сергьятар еке тир, адан къудратлувал хуьн патал ахьтин чIехи армияни герек къвезвай. Гила ахьтин лазимвал авач. Гилан муракаб техникади гзаф кьадар аскеррин везифаяр тамамарзава. Алай вахтунда чи армия пешекарвилинди хьун герек я. Адаз алай девирдин техника идара ийидай пешекарарни герек къвезва. Абурни, лагьайтIа, высший учебный заведенийра, академийра гьазурзава.
Гаф кватай чкадал а кар къейд ийиз кIанзава хьи, чи райондай военный училищейриз ва маса вузриз кIелиз физвайбурун кьадарни йисалай-суз артух жезва. Идалайни алава яз, чи гзаф кьадар жегьилар женгинин къуллугъдин гьакъикъи вахт куьтягь хьайидалай гуьгъуьнизни, икьрарар кутIунна, анра контрактникар яз амукьзава. Хъсан къуллугъзавайбурулай чал чухсагъулдин чарар хквезва.
Дагъустандай, Кавказдай армиядиз тIимил жегьилар тухунихъни вичин себебар авачиз туш. Чи са бязи жегьилри чеб чпи къуллугъзавай частара дуьз тухузвач, чIуру кIвалахар ийизва, женгинин Уставрал амал ийизвач. ГьакIни къунши Чечен Республикада арадал атай дяведин гьерекатрин нетижаяр, алай вахтунда Кеферпатан Кавказда, гьакIни чи республикада авай общественно-политический гьалар (терроризм ва экстремизм) къизгъин хьунни фикирдай акъудна кIандач. Гила армиядиз тухузвай жегьилриз кьве поручителни хьун герек я, гьабурни кIвалах-завай, кIелай чкайрай ва общественный организацийрини абрун гьакъиндай жавабдарвал чпел къачуна кIанзава.
- Гатфарин призывдихъ гекъигайла, армиядиз тухузвай жегьилрин кьадар гзаф хьанвани, тахьайтIа тIимил?
- Гатфарин призывдив гекъигайла, зулун призывдиз чна къуллугъзавай кьве райондай (чи Сулейман-Стальский ва Кьурагь) чаз 15 касдин чкадал 30 кас жегьилар рекье тунин тапшуругъ ганва, абурни чна вири гьазурнава, и йикъара чна 1-этапдик кваз сифтегьан 5 кас къуллугъиз рекье твада.
- Суьгьбетдай чухсагъул, чи гьукуматда ислягьвал хьурай.
Вадим Жамалдинов
