«Наркомания» лугьудай таквадай тIегъуьнди инсанрин сагъламвилиз, чи гележегдин несилриз чIуру патахъди ийизвай таъсир садазни сир туш.
И жигьетдай талукь къуллугъри агьалияр, иллаки чи жегьилар, гъавурда тунин профилактикадин еке кIвалах тухузватIани, муниципальный райондин администрацияда кардик квай наркотикриз акси комиссиядин заседанийрал и жигьетдай кар кьетIдай серенжемар кьабулун патал вилик акъвазнавай месэлайриз килигзаватIани, бейгьуш квай шейэр законсуздаказ цунихъ, ишлемишунихъ ва абуралди алвер авунихъ галаз алакъалу тахсиркарвилерин кьадар, санлай кьурла республикада хьиз, чи райондани йисалай-суз артух хьуни чак виридак къалабулух кутазва.
И йикъара чун бейгьуш квай шейэр ишлемишунал гуьзчивал тухунин рекьяй РФ-дин федеральный къуллугъдин управленидин (УФСКН) Дагъустанда авай районрин уртах С.-Стальский отделдин начальник, полициядин майор Тарланов Эрзиман Тарлановичахъ галаз гуьруьшмиш хьана ва адавай отделди алай йисан сифтегьан паюна тухвай кIвалахдикай куьрелди лугьун тIалабна.
Агъадихъ чна адан суьгьбет гузва.
- РФ-дин УФСКН-дин ДР-да авай районрин уртах чи Сулейман-Стальский отделди вичин кIвалах чалай вине авай къуллугърин къалурунрал ва законрин истемишунрал, чкадин шартIарал амал авуналди туькIуьрнавай махсус пландин бинедаллаз кьиле тухузва. Чи отдел чпихъ талукь тир чирвилер ва кIвалахдин тежриба авай пешекар работникралди бес кьадарда таъмин я. Чна чи кIвалах муниципальный районрин, хуьрерин поселенийрин кьилерихъ, полициядин участковый уполномоченныйрихъ, агъсакъалрин Советрихъ ва маса общественный тешкилатрихъ галаз сих алакъада аваз кьиле тухузва. Бейгьуш квай шейэрихъ галаз алакъалу тир тахсиркавилер дуьздал акъудунихъ галаз санал чна абур тагькимарунин профилактикадин кIвалахдизни еке фикир гузва.
Чи отделди алай йисан сифтегьан паюна тухвай кIвалахдин нетижайрикай рахайтIа къейд ийиз кIанзава хьи, и девирда, вири санлай кьурла, бейгьуш квай шейэрихъ галаз алакъалу тир 14 тахсиркарвал дуьздал акъудна. Абурукайни 12 тахсиркарвал залан ва акьалтIай залан тахсиркарвилерин жергедик акатзавайбур тир.
Алатнавай зур йисан вахтунда чна чеб виликамаз меслят хьуналди бейгьуш квай шейэр маса гунал машгъул тир 2 группа кьуна. Абурукайни са группа чи райондай, муькуьдини Дербентдай тир. Абурай уголовный делояр къарагъарна. И девирда дуьздал акъуднавай вири тахсиркарвилерай 9 уголовный дело къарагъарнава. Абурни асул гьисабдалди бейгьуш квай шей тир марихуана маса гунихъ галаз алакъалубур я. Алай йисан июлдин вацра чи отделдин работникри (оперуполномоченныйри) залан тир бейгьуш квай шейэрин жергедик акатзавай опиум ва героин маса гузвай 2 кас кьуна.
«Мак» операция кьиле тухунин 1-этапдин вахтунда чна хуьрерин администрацийрин кьилерихъ, полициядин участковый уполномоченныйрихъ галаз санал бейгьуш квай шейэр битмишарунал машгъулбур аватIа жагъурун патал кIвалба-кIвал абурухъ галай чилин участокар ахтармишна, агьалияр гъавурда тунин кIвалах кьиле тухвана. Нетижада са административный протокол (штраф) кхьена. Хив районда гзаф кьадарда аваз (22 канаб) битмишарунин гьакъиндай уголовный дело къарагъарна ва ахтармишун кьиле физва.
Алай вахтунда 12-августдилай 20-октябрдалди «Мак» опреациядин 2-этап давам жезва. КIвалерихъ галай чилин участокра хьиз, чна и вахтунда хуьрерин патарив гвай векьин уьруьшра, тамун чкайрани ахтармишунин кIвалахар кьиле тухун давамарда.
Чи акьалтзавай жегьил несил «наркомания» лугьудай таквадай тIегъуьндикай хуьн патал чна тухузвай кIвалахда чаз вири общественностдин патайни куьмек герек я. И жигьетдай кIвалах хъсан эцигнавай хуьрерин поселенийрин жергедай яз Алкьвадарин, Цмуррин ва маса хуьрерин поселенийрин тIварар кьаз жеда.
ЦIийи кIелунин йис башламиш хьунихъ галаз санал чна школьникрихъ галаз и жигьетдай суьгьбетар кьиле тухуда, халкь чкадин СМИ-йрай хабардар ийида, профилактикадин кIвалахдиз артух фикир гуда.
Суьгьбет кхьейди А. Камилов я.
