Гьи пеше хъсан я? И суалдиз, зи фикирдалди, акьалтIай тайин жаваб гуз жедач.
«Вири пешеяр хъсан я», лагьай касни гьахъ яз гьисабиз жеда.
Духтурвал четин, гьа са вахтунда, герек, лап чарасуз пешейрикай сад я лагьайтIа, бажагьат зуни ягъалмиш жеда.
- Духтурвилел зи рикI школада кIелзавай йисарилай алай, къе жувакай и пешедин иеси хьунал, жув агьалийрин сагъламвал хуьнин къаравулда акъвазунал гьавиляй за шадвални ийизва, - лагьана чаз «Сулейман-Стальский райондин центральный больница» ГБУ-дин духтур-офтальмолог Лейла Шихрагьимовади.
Чаз малум хьайивал, Л. Шихрагьимовади Дагъустандин медицинадин академиядин лечебный факультет акьалтIарна. 2003-йисалай инихъ ЦРБ-да аялрин офтальмологвиле гьакъисагъвилелди зегьмет чIугвазва. Лейла Максимовнадин кIвалах вилерин экв хуьнихъ галаз алакъалу я. Лугьуз жеда, гзаф жавабдар, кIвалахдив рикI гваз ва гъавурда аваз эгечIун истемишзавай пеше я. Кабинетда авай «Арзайрин ва теклифрин ктабда» авунвай кхьинрай аквазвайвал, Л. Шихрагьимовадилай хиве авай везифаяр агьалияр рази жедайвал кьилиз акъудиз алакьзава.
- Вилерин экв зайиф аялриз куьмек гун – им Аллагь рази жедай кар я, - лугьузва Лейла Шихрагьимовади. – Жувавай куьмек хьайи гьар са аялди зак лувар кутазва, зун жува хкягъай пешедал мадни кьару ийизва. За гьамиша жува-жувак «Къуй гьар са аял экуь дуьньядиз вичин вилерай килиграй» лугьуз тикрарзава, герекдаз куьмек гуз жувни алахъзава.
Л. Шихрагьимовадихъ галаз ихтилатар ийидайла за кьатIана хьи, пешеди, тамамарзавай кIвалахди адаз руьгьдин таъминвал, рикIин шадвал гузва.
Гаф авач, халис духтур-пешекар я.
Эгер за Лейла Максимовнадиз «Виридалайни хъсан пеше гьим я?» лагьана суал ганайтIа, зун инанмиш я, ада «Духтурвал» лагьана жаваб гудай.
Заз са кар мадни якъин хьана: Лейла Шихрагьимова духтуррин хзандай я. ИкI, адан уьмуьрдин юлдаш Расим Сражидиновича ЦРБ-да психиатр-нарколог яз кIвалахзава. Амни пешедал рикI алай, кIвалахдин гзаф йисарин тежриба авай духтур я.
Амма, Шихрагьимоврин хзанда «кьилин духтур» Рима Эседулаевна я. Расиман диде, Лейладин къари тир ада райондин центральный больницада акушер-гинекологвиле кIвалахиз 40 йисалай виниз я.
