Алай йисан 13-августдиз «Сулейман-Стальский район» муниципальный райондин администрацияда Дагъустан Республикадин Президентдин везифаяр вахтуналди тамамарзавайди тир Рамазан Абдулатипова раиж авур республика вилик тухудай кар алай цIуд проект уьмуьрдиз кечирмишуниз талукьарнавай зональный совещание кьиле фена.
Республикадин ва чкадин бюджетриз налогар кIватIун – им совещанидал алай асул месэла тир.
Совещанидин кIвалахда Дагъустан Республикадин экономикадин министр Раюдин Юсуфов кьиле аваз экономикадин, эменнидин министертвойрин, Кадастровый палатадин, ДР-да авай федеральный налоговый къуллугъдин управленидин, Даггосстатдин, «Дагтехинвентаризация» ГУП-дин руководителрини жавабдар работникри, Сулейман-Стальский, Агъул, Кьурагь ва Хив муниципальный районрин кьилери, администрацийрин ва хуьрерин поселенийрин кьилери, управленийринни отделрин руководителри иштиракна.
Атанвай мугьманар тебрик авуналди ва алай месэлайрикай лугьуналди, совещание «Сулейман-Стальский район» муниципальный райондин Кьил Нариман Шамсудинович Абдулмуталибова ачухна.
Дагъустан Республика вилик тухудай кар алай цIуд проектдикай, абурун важиблувиликай ва и карда республикадин, гьакIни чкадин бюджетдиз налогар кIватIунихъ авай метлебдикай совещанидал Дагъустан Республикадин экономикадин министр Раюдин Юсуфова гегьенш доклад авуна. Ада къейд авурвал, республикадин Президентдин везифаяр вахтуналди тамамарзавайди тир Рамазан Абдулатипова налогар кIватIун 2-3 сеферда артухарунин везифа эцигнава. Ам кьилиз акъуддай мумкинвал чахъ авазва, иллаки эменнидилай, чилерилай ва транспортдин такьатрилай. Докладчиди къейд авурвал, налогар кIватIунин рекьяй эменнидин, чилерин инвентаризация тухунихъ еке метлеб ава.
Совещанидал алай месэладай ДР-дин экономикадин министрдин советник Камиль Мустафаева, ДР-дин эменнидин министрдин заместитель Сократ Бабаханова, финансрин министрдин заместитель Махач Расулова, «Росреестр» Кадастровый палатадин ФГБУ-дин директор Маил Нефтялиева, республикадин УФНС-дин отделдин начальник Закирбег Таибова, районрин уртах налоговый инспекциядин начальник Саид Асланова, Кьурагь Сулейман-Стальский райондин администрациядин Кьил Сефербег Гьамидова, «Сулейман-Стальский район» муниципальный райондин администрациядин Кьил Штибег Мегьамедханова чпин фикирар лагьана.
Хазран Кьасумов
