РФ-дин Президент Владимир Путинан Указдалди Россиядин Дагъустан Республикада авай УФСКН-дин руководителвиле полициядин полковник Энрик Муслимов тайинарнава.
Энрик Селимович Муслимов 1968-йисан 1-мартдиз ДАССР-дин Сулейман-Стальский райондин АгъастIал-къазмайрин хуьре дидедиз хьана. 1986-1988-йисара Украинада стратегический метлеб авай ракетный кьушунра армиядин жергейра къуллугъна. 1991-йисуз ДГУ-дин экономический факультет лап хъсан къиметар аваз акьалтIарна, 1995-йисуз и университетда «юриспруденция» пешедай кьвед лагьай кьилин образование къачуна.
Э. С. Муслимов 1996-йисуз Россиядин Федерациядин Дагъустан Республикада авай налоговый полициядин Федеральный Управленида силисчивиле кIвалахал кьабулна. Налоговый полициядин къуллугъ реорганизация авурдалай гуьгъуьниз 2003-йисан июлдиз ам наркоконтролдин органра силисдин къуллугъдин начальникдин заместителвилин къуллугъдал тайинарна. 2006-йисан апрелдилай силисдин къуллугъдин начальник, 2008-йисан августдилай РФ-дин УФСКН-дин Дагъустан Республикада авай силисдин къуллугъдин начальник – Управленидин начальникдин заместитель тир.
Э. С. Муслимов 2005-йисуз «За заслуги» рикIел аламукьдай знак, «За отличие в службе в органах наркоконтроля» медаль, 2011-йисуз «Почетный сотрудник органов наркоконтроля» хурудал алкIурдай знак гуниз лайихлу хьана. Ам «Дагъустан Республикадин лайихлу юрист» гьуьрметдин тIварцIин сагьиб я.
2011-йисан 13-октябрдилай Россиядин ФСКН-дин ДР-да авай Управленидин начальниквилин везифаяр вахтуналди тамамарзавай.
