29-июлдиз «Сулейман-Стальский район» муниципальный райондин терроризмдиз акси комиссиядин заседание хьана.
Адан кIвалахда муниципальный райондин Кьил, и комиссиядин председатель Нариман Шамсудинович Абдулмуталибова, администрациядин Кьил Штибег Гьажимегьамедович Мегьамедханова, администрациядин кьилин заместителри, управленийрин начальникри, къайдаяр хуьдай органрин жавабдар работникри, хуьрерин поселенийрин кьилери, общественный тешкилатрин, СМИ-дин такьатрин векилри иштиракна.
Заседание, алай месэлайрикай лугьуналди, Нариман Шамсудинович Абдулмуталибова ачухна ва кьилени тухвана.
Ада анал терроризмдиз акси комиссияди авур кIвалахдикай, адан вилик эцигнавай важиблу месэлайрикай, и кардин патахъай районда авай гьалдикай лагьана.
Гуьгъуьнлай заседанидал райондин ОВД-дин начальник Мирзеханов Абдулагьа информация авуна. Ада къейд авурвал, алай вахтунда райондин территорияда религиозно-экстремистский кIвалахрал машгъул тир 28 кас регистрация авунва, абурукай 8 кас алай йисуз учетдиз къачунва. Райондай 6 касди Сириядин сергьятда кьиле физвай дяведин гьерекатра иштиракзава. Ибур Египетдани Сирияда кIелзава лугьуз религиозно-экстремистский чинебан кIвалах тухузвайбур я.
Ана религиозный чирвилер къачурбуру ватандиз хтана ислягь уьмуьр бажагьат тухуда, абурукай бандформированийрин членар жезва, ислягь халкьдин, иллаки жегьилрин арада религиозно-экстремистский идеология пропаганда ийизва.
Заседанидал алай месэладай ДР-дин ФСБ-дин 4-отделенидин начальник А. Рустамова, райондин имам Рамазан-гьажи Рустамова, администрациядин кьилин заместитель С. Велиева алава информацияр авуна.
Санлай кьурла, религиозно-политический гьалар райондин сергьятда къайдадик ква, инсанар чуьнуьхай ва я абур залуквиле кьур ва бандитвилер авур дуьшуьшар хьанвач. Комиссиядин заседанидал къейд авурвал, ислам дявейралди, чуьруькралди ваъ, ислягьвилелди, хъсан краралди гегьеншарун лазим я. Вири динэгьлияр ислягьвилелди, сад-садан гъавурда акьаз, яшамиш хьана кIанда.
Нариман Шамсудинович Абдулмуталибова къейд авурвал, чи аялар, жегьилар тербияламишунин карда Конститутциядин нормайрал ва къайдайрал кIевидаказ амал авун лазим я. Абур патриотизмдин, интернационализмдин руьгьдаллаз, законриз яб гузвай обществодин гражданар яз чIехи ва яшамиш хьун важиблу я. Райондин администрацияди, общественный тешкилатри, къайдаяр хуьдай органри, религиядин векилри чпин вири къуватар кIватIун, обществодин тIе-гъуьндихъ-экстремизмдихъ ва терроризмдихъ галаз женг чIугун чарасуз я. Чна кардик квай законрин истемишунар фикирда кьуналди, диндин тешкилатриз куьмек гун, чкадин самоуправленидин крарик къаришмиш хьунин вилик пад кьун, гуьгьуьллу халкьдин дружинникрин мумкинвилер гегьеншарун лазим я.
Заседанидал гьакI Савин Мирзоевич Велиева гзаф инсанар кIватI жезвай пуд мертебадин административный, ЦРБ-дин дараматар, «Терсепул» базар, образованидин учрежденияр ва ихьтин маса идараяр террориствилин гьерекатрикай хуьн патал тухузвай серенжемрикай,и рекьяй амай кимивилерикай информация авуна.
Заседанидин нетижаяр Нариман Шамсудинович Абдулмуталибова кьуна, комиссияди тухвай кIвалахдиз тайин къимет, кIвалах мадни хъсанардай теклифар гана.
