Алатай гьафтеда райондин Общественный Советдинни агъсакъалрин советрин саналди тир заседание хьана. Ам «Сулейман-Стальский район» муниципальный райондин Кьил Нариман Шамсудинович Абдулмуталибова ачухна ва кьиле тухвана.
Анал Общественный Советдин везифайрикай ва кIвалахдикай райондин администрациядин кьилин заместитель Савин Мирзоевич Велиева информация авуна. Ада къейд авурвал, Совет 32 касдикай ибарат я, ам 5 йисан муддатда хкязава. Советдихъ 2011-йисуз райондин Собранидал тестикьарнавай Положение ава. Къенин заседанидал чна Советдин председатель хкягъун лазим я.
Райондин дяведин ва зегьметдин, къайдаяр хуьдай органрин ветеранрин Советдин председателдин везифаяр вахтуналди тамамарзавайди тир Ислеман Ризаева Общественный Советдин председателвиле хкягъун патал Алимет Алиметович Мейланован кандидатурадин теклиф гана. Адан тереф АгъастIалрин къазмайрин юкьван школадин директордин заместитель Венера Ханвердиевади, зегьметдин ветеран Ягъибег Ягъибегова, шаир, СтIал Сулейманан тIварунихъ галай фондунин председатель Сажидин Саидгьасанова ва масабуру хвена. Советдин членри сесер гуналди Алимет Алиметович Общественный Советдин председателвиле хкяна.
Куьруь къейд. Мейланов Алимет Алиметович 1948-йисан 8-сентябрдиз Сулейман-Стальский райондин Испикрин хуьре дидедиз хьана. 1966-йисуз Шихидхуьруьн юкьван школа, 1971-йисуз Дагъустандин хуьруьн майишатдин институтдин агрономический факультет, 1984-йисузни высший партийный школа акьалтIарна.
Зегьметдин рехъ «Касумкентский» совхозда агрономвилелай башламишна. Гуьгъуьнлай старший агроном, отделенидин управляющий, профкомдин председатель ва парткомдин секретарь хьана.
1977-1980-йисара КПСС-дин Сулейман-Стальский РК-дин инструкторвиле, отделдин заведующийвиле кIвалахна. 1980-1989-йисара КПСС-дин Дагъустандин обкомдин инструкторвиле, КПСС-дин Сулейман-Стальский РК-дин кьвед ва сад лагьай секретарвиле кIвалахна.
1989-1992-йисара ДАССР-дин министррин Советдин социально-экономический рекьяй вилик финин отделдин заведующийвиле, 1992-1997-йисара Сулейман-Стальский райондин хуьруьн майишатдин управленидин начальниквиле, администрациядин кьилин заместителвиле, 1997-йисалай пенсиядиз экъечIай 2010-йисалди ДР-да авай Роснедвижимостдин Сулейман-Стальский районрин уртах отделдин начальниквиле кIвалахна.
Дагъустан Республикадин Верховный Советдин, Халкьдин Собранидин 10 ва 11-созыврин депутатвиле хкяна.
XIX-Вирисоюздин партконференциядин делегатвиле хкяна.
«ДР-дин хуьруьн майишатдин лайихлу работник» тIвар, ДР-дин Президентдин Гьуьрметдин грамота ганва, зегьметдин ветеран я.
А.А.Мейланова вичиз ихтибар авунай Общественный Советдин членриз чухсагъул лагьана ва район вилик тухун патал Советдин вилик акъвазнавай везифайрикай куьрелди лагьана.
-Гьуьрметлу юлдашар!-лагьана Нариман Шамсудинович Абдулмуталибова. -Чна Алимет Алиметович Общественный Советдин председателвиле хкягъун мубаракзава. Ам лайихлу, районда ва республикада жавабдар къуллугърал кIвалах авур, райондин вилик акъвазнавай везифайрин гъавурда авай, агьалийрин патай гьуьрмет авай инсан я. Гьелбетда, вилик акъвазнавай везифаяр кьилиз акъудун патал хъсан пешекарар герек къвезва, абурулай гзаф крар, райондин гележег аслу я. И рекьяй чна еке умудар Общественный Советдикни кутазва. Алай йисуз чи районди социально-экономикадин рекьерай дагъдин ценерив гвай районрин арада 3-чка кьунва. Им агалкьун я. ЯтIани и рекьерай вилик еке везифаяр акъвазнава. Умудлу я, и рекье Советдин, общественный тешкилатрин пай екеди жеда.
Гуьгъуьнлай агъсакъалрин Советдин заседанидин кIвалах давамна.
Анал «Дагъустан Республикадин Президентдин патав гвай агъсакъалрин Советдин заседанидин нетижайрикай» ва «Районда спортдинни физкультурадин кIвалах хъсанарунин гьакъиндай» месэлайрай райондин агъсакъалрин Советдин председатель Фахрудин гьажи Османова гегьенш информация авуна.
И месэлайрай анал гьакI РУО-дин начальник Жабраил Асланов, райондин культурадинни информациядин управленидин начальникдин заместитель Амир Жабраилов, райондин имам Рамазан гьажи, жегьилрин парламентдин председатель Эльдар Агасов, зегьметдин ветеран Мирзехан Мирзеханов рахана.
Хазран Кьасумов.
