Ватандин ЧIехи дяведин йисара Сулейман-Стальский райондин хуьрерай фронтдиз 3960 кас фена, женгера иштиракна, кьегьалвилер къалурна. Абурукай 1832 касдиз элкъвена хтун кьисмет хьанач.
Фронтдиз фейи кьегьалрихъ галаз санал, Гъалибвал къачуник далу пата гьакъисагъвилелди зегьмет чIугуналди ва фронтдиз чпин патай пулуналди, маса шейэралди куьмек гуналди, хуьрерин агьалийри чпин еке пайни кутуна. Идан гьакъиндай райондиз И.В.Сталиналай тебрикдин чарар ва телеграммаяр хтуни ачухдиз шагьидвал ийизва. Агъадихъ гузвай ихьтин чарар ва телеграммаяр 1945-йисан январдин вацра «Колхоздин пайдах» газетдизни акъатнай.
1. «Кьасумхуьр, Дагъустан АССР.
Ялцугърин Етим Эминан тIварунихъ галай колхоздин сифтегьан парткомитетдин секре¬тарь юл. Алимирзоеваз, КIахцугърин Дахадаеван тIварунихъ галай колхоздин председатель юл. Гуьлметоваз.
Фронтовикрин хизанриз куьмекдин фондуниз 15000 манат пул, малар, хуьруьн майишатдин продуктар ва шейэр кIватIай Етим Эминан ва Дахадаеван тIварунихъ галай колхозрин колхозчи итимриз ва дишегьлийриз зи стхавилин салам ва Красная Армиядин патай чухсагъул лагь.
И.СТАЛИН».
2. «Кьасумхуьр, Дагъустан АССР.
КIварчагърин «Коммуна» тIвар алай колхоз¬дин сифтегьан комсомолдин тешкилатдин секре¬тарь юл. Байрамбеговаз.
Дяведин къуллугъчийрин хизанрин гьакъиндай къайгъу чIугунай вуна, юлдаш Байранбегов, зи салам ва Красная Армиядин патай чухсагъул кьабула.
И.СТАЛИН».
3. Абдулагъадин куьмек.
Агъа СтIалрин Сулейман-Стальскийдин тIварунихъ галай колхоздин бухгалтер Шагьмирзоев Абдулагъади фронтовикрин хизанриз куьмекдин фондуниз кьилди вичин патай 230 ки¬лограмм техил, 2000 манат пул, са жунгав гана ва ада 2 фронтовикдин аялриз парталар гьазурна. И кардин гьакъиндай ада чIехи Сталиналай телеграмма къачуна.
Райондин «Колхоздин пайдах» газетдин фондунай чаз агъадихъ галай телеграммани жагъана.
Москва. Кремль. Играми Иосиф Виссарионович СТАЛИНАЗ.
Красная Армиядин яракьлу къуватар артухаруниз куьмек яз за, ДАССР-дин Кьасумхуьруьн райондин Хтунрин хуьруьн Долоресан тIва¬рунихъ галай колхоздин председатель Сулейманов Мигьралиди, зи патай 10000 манат ганва.
Къуй и за гузвай са тIимил пул чи пак тир чил немсерин бандитрикай азад авунин карда Красная Армиядиз куьмек хьурай.
Мигьрали СУЛЕЙМАНОВ, 1944-йис, мартдин варз.
Са тIимил йикъарилай М.Сулейманова И.Сталиналай чухсагъул лугьузвай телеграмма къачунай.
