ГЬавайда лугьузвайди туш, «газет хци яракь я». Заз и кар гьамиша ашкара я, гьикI лагьайтIа зун газетдихъ галаз лап аял чIавалай таниш кас я.
Зи сифте макъала Рухунрин 8-йисан школада вад лагьай классда кIелзавай чIавуз «Коммунизмдин гатфар» газетдиз 1963-йисуз акъатнай. Ам за чи хуьруьнви, колхоздин нехирбан Ражабов Муса халудикай кхьенай.
Макъала акъатай югъ заз сувар хьанай, и карди зи руьгь хкажнай, зак гьевес кутунай. Ам кхьинин карда заз муаллимар тир Исламудин Гьуьсейнова ва рагьметлу Кьасум Жамиева куьмекар ганай.
А вахтунда газетдин редактор Сайид халу тир. Ана Абдусемед, Играмудин, Алибег, Абдулбари, Мегьамедсадикь хьтин къаш-къамат авай инсанри зегьмет чIугвазвай.
1964-йисуз газетдиз Гагариназ бахшнавай зи шиир акъатна.
Гьа и йисан гатфарихъ, майдин вацра Герейханован тIварунихъ галай совхоздин стадиондал райондин спартакиада кьиле тухузвай, зунни кутунай Рухунрин 8-йисан школадин командадик. Хъфидайла, колхоздин шофер Бейдуллагь халуди Кьасумхуьруьн майдандал машин акъвазарна, низ вуч кIан ятIа къачу, - лагьана теклифар гайила, зун редакциядиз фенай. Ана зи хуьруьнви Абдулбари Магьмудова зун хушдиз кьабулна ва редакциядин работникрихъ галаз танишарна. И карди заз кIелунин, газетдихъ галаз алакъа гьамиша хуьнин кардани еке къуват гана.
1966-йисуз залзала хьайила зун кIелун давамарун патал ЦIийи Макьаз хтана. Хуьр аниз куьч хьанвай. Инани за газетдихъ галаз сих алакъа хвена. За аниз хуьре жезвай дегишвилерикай, школадин, яшайишдин хабарар гузвай. Шиирар кхьинин карда заз рагьметлу Шагьабудин Шихбабаева гзаф куьмек гана, меслятар къалурна. За газетдиз шиир ракъурайла, адалай заз, вичин патав атун меслятзавай чар хкведай. Зун фидай. Ада хваш-беш авурдалай кьулухъ, и шиирдин и цIар икI хъувуртIа ваз гьикI аквазва? - суал гудай. За разивал къалурдай.
А вахтара «Коммунист», «Коммунизмдин гатфар» газетрин саналди тир совещанияр кьиле тухудай. Аниз активный селькорриз теклифдай. «Коммунист» газетдин векилди, райондин газет¬дин редакторди чпин патайни хъсан селькорриз пулдин, къиметлу пишкешар ва гьуьрметдин грамотаяр гудай. Гьавиляйни, совещанидин иштиракчи хьун, жуван зегьметдиз виридан вилик тIвар кьуна къимет гун, им гекъигун авачир зурба кIвалах тир.
Зун Советрин Армиядин жергейриз фидалди (1969-йис) 4 совещанидин иштиракчи хьана. Редакциядин патай заз 4 грамо¬та ва «Смена-8» фотоаппаратни ганай. Кхьей макъалайрай гьар вацра пул хкведай. Газетди вичел гьар са кас желб ийизвай.
Эхиримжи йисара районда экономикадин гьалар дегиш хьунихъ галаз сад хьиз, акваз-акваз редакциядин гьални хъсан патахъ элкъвена. Райондин кьиле Имам Яралиев хьайи куьруь вахтунда ада вири идарайрин, карханайрин гьал ахтармишна гьина ни зегьмет чIугвазватIа, абуруз къулай шартIар тешкилун кьетIна. Гьа икI, нубат «Куьредин хабарар» газетдални атана.
Газетдин цIийи редактор, РФ-дин журналистрин Союздин член Анварбег Миметова, ремонтар авуниз чара авур пул тайинарнавай кIвалахриз харжна. Нетижада адалай дарамат къене-къеце паталай дуьзгуьн ремонт ийиз, иер кIалубдиз гъиз, редакциядин сергьят кIевириз, гьаятда къизилгуьлер цуьквер битмишариз, михьивал хуьз алакьна.
Редакцияда гьар са работникдиз кIвалахдай вири жуьредин шартIар тешкилна, цIийи мебель хкана, лазим вири шейэралди тадаракламишна. Анжах гила адалай рикIиз регьят хьанвайвилин ухьт алахьна ва гьар садавай ери аваз кIвалахни истемишзава. Заз чир хьайивал, редакторди вичин коллективдал дамах ийизва, абурал ихтибарзава.
Ада газетдиз чкайрилай хабарар, макъалаяр кхьизвайбурун кьадар артух хьун патал талукь серенжемарни кьабулнава.
Сулейманан шииратдин йикъариз, муаллимрин йисаз, гьакIни гьар са лишанлу вакъиадиз талукь яз конкурсар малумарзава, 1-3 чкаяр кьурбуруз 500-1000 манатдин кьадарда аваз премияр гузва. Гьар йисуз газетдин редакциядиз селькорриз теклифзава, ана абурухъ галаз совещанияр тухузва, вилик акъвазнавай, авуна кIанзамай кIвалахрикай фикирар лугьузва, меслятар къалурзава, теклифар гузва. Газетдиз ара датIуз ма¬къалаяр кхьизвайбурун тIварар кьазва, абур руьгьламишзава, пулдин премияр, гьуьрметдин грамотаяр гузва.
Алатай йисарив гекъигайла, цIинин йисуз газетдин тираж саки 500-далай артух хьана. Газетда экстремизмдиз, терроризмдиз акси, аялар тербияламишуниз, ватанпересвилиз эвер гузвай макъалайрини кьетIен чка кьазва.
Алай йисуз газетдин 80 йис тамам жезва. И юбилей лайих¬лувилелди къейд авуник редакциядин работникри, хуьрерин мухбирри, газет кIелзавай гьар са касди вичин лайихлу пай кутун лазим я.
Заз аквазвайвал, редактор А.Миметов кIвалахдин кьацIа гьатнавай кас я, газетдин 80 йисан юбилей лайихлувилелди къейд авун патал, ам саки йис вилик кумаз къайгъудик ква.
«Сулейман-Стальский район» МО-дин кьил Нариман Шамсудиновичани газет вини дережада хьун патал акьалтIай зегьмет чIугвазва, ам райондин чин тирди гьисс авуналди, редакциядиз вири патарихъай куьмекар гузва.
