Шегьердиз фейила, Перидал къунши хуьряй тир таниш дишегьли Айна гьалтна.
- Заз ван хьайивал, вуна гададиз свасни гъана, рушни гъуьлуьз гана, - жузун-качузун авурдалай гуьгъуьниз лугьузва Айнади. – Свас гьихьтинди я, руш туькIвей чкадиз аватнани?
- За ваз гьикI лугьун, чан вах, свас чаз кIандайди, разивал ийиз жедайди хьанач, - ухьт аладарна хьиз, жаваб гузва Периди. – Свас югъди, йифди телевизордин кIане жеда, йикъа пуд-кьудра алай парталар дегишарда, дамахарда, туьквендиз физ-хуькведа. Пек-лек чуьхуьн, тIуьн гьазурун, кIвале михьивилер авун – ибур зи гададин везифаяр хьанва. Чидач, вах, эхир гьикI жедатIа.
- Хъсан хьанач хьи... я чан вах, рушакай кьванни ви рикI динж яни? – жузуна Айнади.
- Аллагьдиз шукур, зи вах, рушакай зи рикI динж я, - шадвал кваз рахана Пери. – Адал гьалтай итим къизил я: хъсан мажиб къведай кIвалахални ала, хтайла кIвале тIуьнни гьазурда, къапарни чуьхуьда... Нез-ксудай кьван рушни яцIу хьанва, адан кефини езнеди хазвач.
- Вучда кьван, чан вах, мисалда лугьузвайвал, садбуруз гузвай, садбур кузвай дуьнья я им, - гьакъикъатдин гъавурда акьурла, айгьамдивди лагьана Айнади.
Хазран Кьасумов
