Эхь, гьуьрметлу газет кIелзавайди, вуна дуьз кьатIана: и макъаладин кьил яз гъанвай пуд гафни за чIехи гьарфарилай кхьенва. Ихтилат РФ-дин журналистрин ва лезги писателрин союзрин член, ДР-дин культурадин лайихлу работник, шаир, общественник Абидин Саидович Камиловакай фидайла и кар заз дуьз яз акуна. Умудлу я, зи тереф ам хъсандиз чизвай, эдебиятдал, медениятдал рикI алай вири инсанри хуьда.
Шаирар... Аламатдин инсанар я абур. Масадаз таквадай крар абуруз аквада, масадбуру фикирни тагудай крар абуру кьатIуда, абуру фикир тагана гьич са карни тадач. Абурун рикIяй къведай шииррин цIарар вуч я?! Килиг садра Абидин Камилова Лезгистандиз гимн яз вуч кхьизват1а:
Зи Лезгистан - лекьерин макан!
Ви тарих къадим тир са мах я.
Ви чилел хана, ви кьеб, лакьан
Кьисмет хьун еке тир са бахт я.
Гъуцари женнет яз гана вун,
Ви халкьдин жумартвал акуна.
Лагь, шумуд цIаяра кана вун,
Шегьерар чилив сад авуна?
Амма ви кьисмет на квадарнач –
Невейриз хвена пак чил ва чIал.
Душманрин рикIер гьич шадарнач –
Дагъдин лекь – «Лезги» тIвар
хвена вал.
Кьисметди девиррал тада кьацI,
Амма чил амукьда эбеди.
КIан я заз Шагь дагъни Кьулан вацI
Пайдахдал акваз зи уьлкведин!
Садвал! - эвер гун я вахтунин.
Садвал! - куьлег я чи бахтунин.
Садвал! - везин я чи ивидин.
Садвал! - веси я Шарвилидин.
Ихьтин ялавлу, гьар са инсандик къагьриманвилин гьиссер кутадай шиирдин цIарар анжах Ватандихъ, халкьдихъ, абурун гележегдихъ ялварзавай шаирдин рикIяй къведа.
Лугьуз жеда хьи, Абидин Камилов дуьньядиз шаир яз атай кас я. Ада шиирар ва литературадин маса эсерар (къаравилияр, гъезелар...) гьеле школада гъвечIи классра кIелзавай йисара кхьиз башламишна. Армиядин жергейра къуллугъдай, ДГУ-дин филологиядин факультетда кIелдай йисарани ада къелемдиз къуьруь жедай мумкинвал ганач. Ялавлу гьевес, кьетIен хатI, бажарагълувал себеб яз ам 1980-йисуз райондин «Коммунизмдин гатфар» (гилан «Куьредин хабарар») газетдин редакциядиз кIвалахдални хтана. Гьа йикъалай къенин йикъалди Абидин Камилова редакцияда кIвалахзава, эхиримжи 20-23 йисан къене лагьайтIа – газетдин культурадин отделдин заведующий яз. Гьар са вахтуниз, кьиле физвай вакъиайриз къимет гуз алакьдай журналист тир ада республикадин газетрихъ ва журналрихъ галазни сих алакъа хуьзва.
И йисара Абидин Камилова шииратдин рекьени бегьерлувилелди кIвалахзава. Адан яратмишунрин туькIуьр хьунин кIалубар, тематика гегьенш, образар, тешпигьар жуьреба-жуьре ва къешенг я. Ам шаир-лирик, шаир-ватанперес, шаир-насигьатчи я лагьайтIа, бажагьат зун ягъалмиш жеда. Гьелбетда, А. Камилован яратмишунра муьгьуьббатдин шиирри еке чка кьазва. Адан хейлин шиирриз композиторри музыка кхьенва, «Шамсият», «Лезги руш», «Яру перем алай суна», «Дидедиз», «Рычал», «КIаниди», «Кавказ» ва маса манияр халкьдинбуруз элкъвенва.
Гражданвилин, ватанпересвилин шииррини Абидин Камилован яратмишунра кьетIен чка кьазва. «Сагъ я лезги чил» шиир ада ихьтин цIараралди башламишзава:
Чахъ чи Алпан, Рагъ амай кьван,
Ахцегьжуван багъ амай кьван,
Чи къадим Къаф дагъ амай кьван,
Сагъ я Лезги чил!
Чахъ чи Кьулан вацI амай кьван,
«КIелед хве», «Пак кьацI» амай кьван,
Каспий гьуьлуьн яцI амай кьван,
Сагъ я Лезги чил!
Абидин Камилован шиирар, къаравилияр уртах «Куьредин ярар», «Лезги зарияр», «Илгьамдин чешме», «Куьредин ярарин 20 йис» ктабра гьатнава. Ам гьакI шииррин «Руьгьдин гуьзгуь», «Гъезелар», «Ватандихъ ялвар», «Руьгьдин гьарай», къаравилийрин «Машгьурвилин суракьда», гьакIни Ватандин ЧIехи дяведин иштиракчи Батман Салмановакай кхьенвай «Вири уьмуьр – ачух ктаб я» (урус чIалалди) ктабрин автор я.
Бажарагълу журналист, кьетIен хатI авай шаир хьиз, Абидин Саидович хъсан общественник – ЛПС-дин райондин отделенидин председатель, «Куьредин ярар» общественный культурадин центрдин комитетдин член, «Куьредин хабарар» газетдин редакциядин профсоюзный комитетдин председателни я. Районда ва адалай къеце тухузвай жуьреба-жуьре мярекатрани ада активвилелди иштиракзава.
... Вахт санал акъвазнавач, ада виликди еримишзава. Ингье, чи къелемдин стха, кIвалахдин юлдаш Абидин Саидович Камилован 60 йис тамам хьанва. Им тIимил яни, гзаф? Зи фикирдалди, вичиз тIебиатди са шумуд патахъай пай ганвай А. Камилов хьтин инсан патал им яратмишунрин чагъинда авай бере я.
«Зи жигерра къекъвезмай кьван, Шагь дагъдин шагьвар, зи Ватандихъ ийида за мидаим ялвар...» гафар кхьей Абидин Камиловаз 60 йисан юбилей мубарак авуналди, редакциядин коллективдиз адахъ мягькем сагъламвал, яратмишунрин рекье агалкьунар хьун кIанзава. Заз жуван макъала шиирдин цIараралди куьтягьиз кIанзава:
Шииратдин векил, къадим Куьредин,
РикI гьиссерив ацIанвай, шаир Абидин.
Чи мурад я вун, йикъав агакьун,
Юбилей къейд ийидай - тамам асирдин!
