Йисан виридалайни гуьзел вахтарикай сад тир гатфарни яваш-яваш тамамвилелди вичин ихтиярда гьатзава. Идахъ галаз санал гатфарин сад лагьай сувар – Виридуьньядин дишегьлийрин Югъни – атана агакьна. Адаз талукь яз райондин культурадин Дворецда шадвилин чIехи мярекат кьиле фена. Бул няметар алай столрихъ и межлисдиз теклифнавай, чпи райондин, хуьрерин идарайра, организацийра кIвалах авур ва ийизвай, хуьре-кIвале гьуьрмет авай дишегьлийри чкаяр кьунвай, ВИА-дин коллективди язавай ширин авазри абурун гуьгьуьлар мадни хкажзавай.
Тебрикдин куьруь гаф лугьуналди, шадвилин мярекат КТВ-дин руководитель Я. Ярагьмедова ачухна ва устадвилелди кьилени тухвана.
Сифте гаф «Сулейман-Стальский район» муниципальный райондин Кьил Нариман Шамсудинович Абдулмуталибов рахана.
- Гьуьрметлу дидеяр, вахар! - лагьана Нариман Шамсудинович Абдулмуталибова, - къенин сувар квез талукьарнавайди ва бахшнавайди я. За муниципальный райондин администрациядин, депутатрин Собранидин, кьилди жуван ва райондин вири итимрин патай квез гатфарин сад лагьай сувар – Виридуьньядин дишегьлийрин Югъ рикIин сидкьидай мубаракзава. Шад жедай кар я хьи, чи районда чпихъ кьетIен бажарагъ, чирвилерни алакьунар авай гзаф дишегьлияр яшамиш жезва, район вилик финик, хъсан, баркаллу крарик абуру чпин зегьметдин еке пай кутазва. ИкI фад алатай вахтарани, лап агъур Ватандин ЧIехи дяведин йисарани, гуьгъуьнин вахтарани хьайиди я, зун инанмиш я, къенлай кьулухъни гьакI жеда.
Чи гьуьрмет квез, гьуьрметлу дидеяр, вахар, кьетIенди я. Гьихьтин къал-къиж хьайитIани, дидейри шал чилел вегьезва, гьасятда чуьруьк акъваз жезва. Гьавиляй «Женнет дидейрин кIвачерик ква» лугьунни ийизва.
Вири дишегьлийриз мад сеферда сувар мубаракрай! Квехъ сагъламвал, хзандин бахтлувал, веледрикай рикIин динжвал хьурай!
Нариман Шамсудинович Абдулмуталибован рахунрилай гуьгъуьниз Дагъустандин халкьдин артист Тарлан Ма- медова «Диде» мани тамамарна.
Шадвилин межлисдал 50 йисуз муаллимвиле кIвалахзавай Курхуьрелай тир Ф. Гьажиева, ЦРБ-дин духтур Ж. Фаталиева, КТВ-дин бухгалтер Р. Бабаева, Дагъустан Республикадин культурадин лайихлу работник Б. Гьажиева, «сельсовет Новомакинский» МО-дин кьилин пешекар А. Рагьимханова ва гзаф маса юлдашар рахана, суварихъ галаз алакъалу хуш келимаяр лагьана.
Гьар са касдин тебрикрилай гуьгъуьниз ДР-дин халкьдин артист Т. Мамедова, гьевескар манидарар К. Камилова, А. Ризаева, Н. Исабегова ва масабуру манияр лагьана, культурадин Дворецдин патав гвай аялрин фольклордин «Куьре» ансамблди кьуьлер авуна.
