Дагъустан Республикадин Президент Мегьамедсалам Мегьамедова Махачкъала шегьерда 15-декабрдиз Дагъустандин халкьарин съезд эвер гуниз талукь Указ акъуднава. Гзаф масадбурук хьиз, ида закни шадвал ва умудлувал кутуна. Вучиз лагьайтIа, зи фикирдалди, ихьтин Съезд тухуни халкьарин вилик акъвазнавай месэлаяр гьялуниз куьмекда. Месэла, алай вахтунда чи республикада бейкаррин кьадар гзаф я, кIвалахдик квачир инсанар, иллаки жегьилар алкоголизмдал, бейгьуш квай шейэр чIугунал ва ихьтин маса кIвалахрал машгъул жезва. Эхиримжи вахтара республикада терроризмди ва экстремиствили кьил хкажнава.
Дагъустандин шагьерра ва районра фадлай кIвалахдик квачиз акъвазнавай заводар, фабрикаяр, карханаяр кардик кухтуна кIанда.
Дагъустандин халкьар дуьньядиз ата-бубайрин адетриз вафалу, баркаллу халкьар хьиз малум я. Абур чи арада авай дуствилел, сада-садаз гьуьрмет авунал, мугьманар кьабулзавай тегьердал гьейран жезва.
Чна жуван Дагъустан, ата-бубайрилай атанвай адетар гележегдани хвена кIанда.
Съезддин делегат тиртIа, за Дагъустандиз инвестицияр желб авунин, кесиб ва жегьил хзанрин яшайишдин месэлаяр гьялдай рекьер жагъурунин гьакъиндай теклифар гудай. Месэлаяр мадни ава.
Умудлу я, и ва маса месэлаяр делегатри Съезддал къарагъарда, ида вичин хъсан нетижани гуда.
Абидат Рагьимханова, Ц1ийи Макьарин администрациядин кьилин пешекар
