Къенин и макъалада вичикай ихтилат физвай Кьасумхуьруьн ЦРБ-дин духтур-анестезиолог тир Абдуллаев Назим Мирзоевич хъсан пешекар ва намуслу инсан яз неинки са чи районда, гьакI Кьиблепатан Дагъустандин маса районрани гзафбуруз чида. И машгьурвални ада вичи хкягъай пешедал рикI хьуналди, вичи гайи Гиппократан кьинез вафалу хьуналди ва вичин инсанвилин ерийралди къазанмишнавайди я.
Гьеле школада кIелзамаз дуьньядин винел виридалайни герек ва ислягь кеспидин иеси – духтур – хьунин къаст рикIевай жегьил гада Кьасумхуьруьн 1-нумрадин юкьван школа куьтягьай 1971-йисуз вичин мурад кьилиз акъудун патал Дагъустандин мединститутдик кIелиз экечIна ва 1977-йисуз ам агалкьунралди акьалтIарна.
Кьве йисуз Нижный Тагилда духтур-хирург яз хьайи ада и кIвалах гуьгъуьнин 1979-1982-йисара Чечняда Гудермес шегьердин больницада давамарна.
1982-йисалай инихъ Назим Мирзоевича Кьасумхуьруьн ЦРБ-да духтур-анестезиолог яз кIвалахзава. Адаз и коллективда еке гьуьрмет ава.
Виридуьньядин анестезиологрин Йикъан пешекарвилин суварин вилик вичихъ галаз авур суьгьбетда кьилин категориядин духтур Назим Мирзоевича лагьайвал, ада и кеспидин пешекар яз 1979-йисалай инихъ кIвалахзава. И жигьетдай адахъ хъсан тежрибани хьанва. И къуллугъ чи ва гьакIни къунши районрани къайдадик кутунин карда адан чалишмишвилер екебур я.
Чарасуз тади дуьшуьшра залан начагъбур ажалдин къармахрай акъудун патал Назим духтурди пешекарвилин куьмек иллаки важиблуди я. Адан тежрибадикай жегьил пешекарри менфят къачузва.
Четин гьалда авайдаз анестезиолог ва гьакIни хирург яз тади куьмек гуз гьазур кас хьиз, ам начагъбуруз вичин ивини гузвайди яз гзафбуруз чида. Ам «Россиядин лайихлу донор» гьуьрметдин тIварцIин сагьибни я.
Назим Мирзоевичан уьмуьрдин юлдаш Абдуллаева Мумина Фуадовнани кьилин категориядин духтур, клиникадинни экспертдин кIвалахдин рекьяй ЦРБ-дин кьилин духтурдин заместитель я. Адазни инин медперсоналдин ва ЦРБ-дин руководстводин патай еке гьуьрмет ва авторитет ава.
Назим Мирзоевич хъсан пешекар хьиз, адалатлу хзандин кьилни я. Ада вичин уьмуьрдин юлдаш Мумина Фуадовнадихъ галаз санал кьве велед чIехи авуна, абуруз кьилин образование гана, уьмуьрдин шегьредал акъуднава.
Пешекарвилин суварин Югъ тебрик авунихъ галаз сад хьиз, чаз Назим духтурдихъ чандин мягькем сагъвал, хзанда бахт-берекат ва веледрикайни хтулрикай рикIин архайинвал хьана кIанзава.
Эхь, гьар са касдиз вичи хкягъай кеспидай руьгьдин таъминвал жагъунилай еке бахт авач. Назим Мирзоевични чаз вичин вири савадлу уьмуьр инсанрин сагъламвал хуьнин баркаллу кардиз бахшнавай бахтлу кас яз чида.
Къуй вичин руьгьдин къуватар мадни артух хьурай!
