Фетяли хуьре авачиз хейлин вахтар хьанвай. Чкадал кIвалах алачирла, масаниз фена, кьве кепек къазанмишна кIандачни кьван?
И йикъара ам хтанва отпускадиз, кIвале ава вичин хзандихъ галаз. КIвале хьун ажеб хъсан тушни?! Жуван кIвалин майишатдин кIвалахар кьилиз акъудда.
Ингье ада векьер янава, исятда маркуна тунва. Аялриз пек-партал ава, паталай хтай са вацра багъ-бустанни къайдадиз гъанва, суфрадик фу, къафун ква.
Къе, гад алукьнавай, йисан виридалайни яргъи юкъуз ФетI лапагрин рачуна ава. Югъ хьайивалди куьлуь карч алай гьайванрин гуьгъуьна аваз фейи рабочий итимдиз кьарай бес хьанач.
Рагъ винидихъ фейивалди дагъдин хуьруьн яргъи куьчейра лапагрин, кIелерин «бя-мядин» ванер гьатна.
- Яда, я Фетяли, им гьи вахт я вуна лапагар хканвайди? ХъуьтIуьн са югъ кьван вахт амайди я няналди! – гьейранвилелди лугьузвай гьар са акур касди.
- Сятиниз килиг. Кьудалай алатнава. Зи рабучий вахт гьеле фад куьтягь хьанва. Муькуь смена фирай. Зун экуьнахъ фад фейиди я йе. Муьжуьд сятинилайни гзаф хьанва, - лугьуз ФетI вичин кIвалин варариз гьахь хъувуна.