-Бах, Алкьвадрин хуьр гьинал алайди я? – хабар кьазва няниз кIвалахдилай хтай завай зи руша.
- Вуч хабар я, вуна Алкьвадар хабар кьазва хьи? – суалдиз суал гузва тажуб хьанвай за.
- Чун музейдиз тухузва! Алкьвадар Гьасан Эфендидин цIийи музейдиз! – шадвилин кьадар авач аялдин.
- Мажал аваз хьанайтIа зунни къведай, чан руш. Алад, тамаш музейдиз, квез аквада чахъ, лезгийрихъ, гьихьтин чIехи алимар авайтIа, абуру кхьенвай ктабрикайни квез ихтилатар ийида. Дикъетдивди яб акала. Аферин, куь муаллимриз, квез аниз экскурсия тешкилзавай!
Ингье, са шумуд гьафте я, аялар чи Кьулан СтIалрин хуьруьн школада гатун варцара ахъайнавай ял ядай лагердай икI гуьгьуьлар шад яз хквез. Каникулрин сифте варз, тарсарикай галат хьанва лугьуз, 7-классдиз акъатнавай зи руша кIвалин кIвалахар ийиз, телевизордиз килигиз, аниз-иниз мугьмандиз физ, акъудна. Кьвед лагьай вацра хуьруьн школада лагерь авайди чизвай руш мад кьаз хьанач. Вичин хиве авай кIвалин кIвалахар вахтунда тамамариз, ам гьар пакаман 9-дан зураз мягьледа авай вичин таярихъ галаз школадиз физ, 3-дан зураз хквезва. Лагерда жуьреба-жуьре физический къугъунрал, кьуьлер авунал, манияр ягъунал машгъул жезвай, ара-ара метлеб авай чкайриз экскурсийризни физвай аялриз вахт гьикI акъатзаватIани чир жезвач. Ана аялриз пакаман ва нисинин тIуьнни гузва. КIвализ хтайла аялдин сивик квай хъвер аквазвай са зун ваъ, амай вири диде-бубаярни, алай секинсуз девирда яргъариз ял ядай лагерриз ракъур тежезвай, чи аялри, иллаки рушари, гатун каникулар жуван хуьре менфятлудаказ кьиле тухунал лап рази я.
Гьукуматдин, республикадин, хайи райондин талукь органри чи аялрин гележегдикай фикирзавайди ихьтин гьакъикъи краралди аквазвай чун гзаф шад я.
