Малум тирвал, алай йисан октябрдин 14-далай 27 дал кьван Вирироссиядин агьалийрин перепись тухун кьетIнава. И кар патал гьеле йис виликамаз вири районра, гьа жигьетдай яз чи райондани, «Дагестанстат» управленидин векилар тестикьарнава.
И мукьвара зун «Дагестанстатдин» Сулейман-Стальский райондин векил Рамазан Къухмазовахъ галаз гуьруьшмиш хьана ва адавай чеб и важиблу политический метлеб авай жавабдар везифадив гьикI эгечIнаватIа суьгьбет авун тIалабна.
- Чун и кардив жавабдарвилелди, гьа сифте йикъалай рикI гваз эгечIнава. А перепись кьиле тухунин важиблувал чаз чизва. Эхиримжи перепись 2002-йисуз кьиле тухвайди тир. Адет яз, гьар 10 йисалай ихьтин кампанияр тухузвайди я. И сеферда 8 йисалай тешкил авун гьукуматдиз хъсан акуна.
Чун кIвалахдив эгечIайдалай инихъ чна райондин 9, чкайрин администрацийрани 33 заседание кьиле тухвана. «Сулейман-Стальский район» МО-дин кьилин везифаяр тамамарзавайди тир Штибег Мегьамедханов кьиле аваз чна 21 касдикай ибарат тир комиссия тешкилнава.
Чна 8 участок, 33 инструктордин участокар ва 143 счетчик тайинарнава. Яни, лагьай гаф жезва хьи, са шумуд хуьруьн администрацияр сад авуна, 8 участок арадал гъанва. 35 кас инструкторар я, яни гьар са кьуд счетчикдиз са инструктор. Чун и кардиз саки гьазур я лагьайтIани жезва.
Перепись тухудай инсанар, кIвалахдай чкаяр гьазур я. Амма куьлуь-шуьлуь кIвалахарни амачиз туш. Месела, Курхуьрел, Герейханован хуьре, Эминхуьре, ЦIийи Макьарал бязи куьчейрал тIварар, кIвалерал нумраяр яна куьтягьнавач. Куьчейрал тIварар, кIвалерал нумраяр тахьайла счетчикар мумкин я акахьун, я фейи кIвализ кьве сеферда фин.
Чна и важиблу кIвалахдиз кьецI тагана жуван хиве авай везифаяр намуслувилелди кьиле тухузва. Са шакни алачиз, и политический метлеб авай кампания уьзуьагъдиз кьилиз акъудда.
