Киш юкъуз, 20-февралдиз, Дагъустандин цIийи Кьил Мегьамедсалам Мегьамедова кьин гана ва ам официальныйдаказ региондин президентвилин къуллугъдин везифаяр кьиле тухунив эгечIна.
Дагъустандин тарихда кьвед лагьай президентдин инаугурация Махачкъалада Максим Горькийдин тIварунихъ галай урусрин драматический театрда кьиле фена.
Райондин сайтди хабар гузвайвал, и мярекатдал Россиядин политический элита кIватI хьанвай. И мярекатда иштирак авун патал Махачкъаладиз Кеферпатан Къафкъаздин федеральный округда Россиядин Федерациядин Президентдин полпред, Россиядин правительстводин вице-премьер Александр Хлопонина РФ-дин Федеральный Собранидин Федерациядин Советдин членри, РФ-дин Госдумадин депутатри, кьиле Чечен Республикадин президент Рамзан Кадыров аваз чеченрин делегацияди, Карачаево-Черкесиядин президент Борис Эбзеева, Ингушетиядин парламетдин председатель Махмуд Сакалова, Россиядин муфтийрин Советдин Председатель, Россиядин Европадик акатзавай паюнин мусурманрин Духовный управленидин председатель Муфтий Шейх Равиль Гайнутдина, Адыгеядай, Калмыкиядай, Ставрополдин ва Краснодардин крайрай, Азербайжан Республикадай, Кьиблепатан Осетиядай атанвай мугьманри, Дагъустандин гьукуматдин членри, республикадин шегьеррин ва районрин муниципальный тешкилатрин кьилери иштиракна.
Дагъустан Республикадин Президентдин векилвилер ихтибар авунин жигьетдай Мегьамедсалам Мегьамедован кандидатурадиз алай йисан 8-февралдиз ДР-дин Халкьдин Собранидал килигун патал теклиф Уьлкведин кьил Дмитрий Медведева ганай. Дагъустандин Парламентди рейсадвилелди сесер гуналди республикадин Президентвиле Мегьамедсалам Мегьамедов тестикьарна.
