№1-2016 год

Ам, акъваз тийиз, виликди фида, я сергьятар, я манийвилер чин тийиз. Эхь, куьне кьатIайвал, ихтилат вахтуникай физва, дагъдин гурлу вацIу хьиз, гьамиша виликди еримишзавай. Гьа секинвал, архайинвал авачир вахт себеб яз, ингье, Ц1егьренди хьайи 2015-йис акъатна, ам Маймундин йис тир 2016-йиса эвезна.

Ингье, 2015-йисни вичин тарихдиз фена. Ам чи район экономикадин, социальный, культурадин рекьерай вилик финин жигьетдай лишанлуди хьайиди хьиз, чи редакциядин коллектив патални бегьерлуди хьана. Вичин тешкилатчи райадминистрация тир чи райондин общественно-политический газет «Куьредин хабарар» адан коллективди вахт-вахтунда акъудун ва вахтунда агьалийрал агакьарун таъминарна.

Чилин къадир авай, зегьметдал рикI алай инсанар яшамиш жезвай Эминхуьре 1980-йисара районда кIвенкIвечи карханайрикай сад тир «Аламишинский» совхоз кардик квай. Маса культураяр битмишарзавай майданар квачиз, адахъ 400 гектардилай виниз майданра уьзуьмлухар авай. Гьайиф хьи, «перестройкадин» ялав адахъни галукьна: гьар са гектардай 80-110 центнер ципицIар кIватI хъийизвай уьзуьмлухар тахьай мисал хьана. Бейкарар яз амукьай гзаф эминхуьруьнвияр, иллаки жегьилар, патарал фена…

ЦIийи йисан вилик чаз фадлай чизвай, лезги халкьдин машгьур рухвайрикай сад тир Дагъустандин хуьруьн майишатдин академиядин ва Москвадин автомобилрин рекьерин университетдин Махачкъалада авай филиалдин профессор, технический илимрин доктор, РД-дин илимдин лайихлу деятель чи баркаллу районэгьли Навруз Гьуьсенбегович ФАТАЛИЕВАН хизандай мад са алим акъатна: адан руш Зайнаб Наврузовнади филологиядин илимрин рекьяй агалкьунралди кандидатвилин диссертация хвена. Къейд ийин хьи, Навруз Гьуьсенбеговичан чIехи руш - Фатима экономикадин илимрин кандидат я.

«Чилел гьаваяр къвердавай чими жезва, къе-пака Антарктидадин муркIарни кваз цIрада», - лугьудай ванер инсанрин япарихъ мукьвал-мукьвал галукьзава. «КIеви хъуьтIер амач. МетIяй ядай бул жив жедайди тир, гила вучиз ятIани гьа живерни къвазмач», - эхиримжи вахтара наразивалзава чнани. - И йисузни чна ЦIийи йисан сувар жив авачиз къейддай хьтинди я, - лагьанай заз алатай йисан декабрдин эхиримжи йикъара Кьасумхуьрел са таниш касди.

Россиядин Яракьлу Къуватрин жергейриз эвер гузвай чи гзаф жегьилри Ватандин вилик чпин хивевай буржи намуслудаказ кьилиз акъудзава.

28-декабрдиз Готфрид Гьасанован тIварунихъ галай райондин музыкальный школада ЦIийи йисан утренник кьиле фена. Школадин директор, ДР-дин культурадин лайихлу работник Къазибег Къурбанова мярекатдин иштиракчийриз алукьзавай ЦIийи йис рикIин сидкьидай мубаракна, школадихъ 2015-йисуз хьайи хъсан нетижайрикай лагьана, республикадин конкурсрани фестивалра гъалиб хьайи аялрин тIварар кьуна, абуруз къиметлу пишкешар гана.