№38

Жабраилов Тажудин 1998-йисан 12-мартдиз Ростов-на-Дону шегьерда дидедиз хьана. 2007- йисалай и областдин Азов шегьердин юкьван школадин сифтегьан классрилай башламишна, «4», «5» къиметралди кIелай Тажудин, алай йисуз 7-классда ава. Мукьвара ам яргъал шегьердай гатун каникулриз баде, шаир Жабраилова Зумриятан патав еке тир муштулухар гваз хтанвай. ЦIикьвед йиса авай аялди 14 медаль бадедин гиниз вегьена. 2010-йисуз Тажудина, кIелунни давам ийиз, машгьур композитор С.Прокофьеван тIварунихъ галай пианинодал къугъвадай музыкальный школани хъсан къиметралди кIелна акьалтIарнава. Тарифдин кIвалах ам я хьи, Тажудин Жабраилов, музыкадал хьиз, спортдални рикI алай аял я. 2007-йисан ноябрдин вацралай ам Азов шегьердин «Якорь» тIвар алай яхта клубда парусдин спортдин школадиз физва. Са йисни жедалди, яни 2008- йисуз Тажудина, Ростовдин областда парус алай луьткве идара ийизвай акъажунра иштирак авуна, пуд лагьай чка кьуналди, вичин сад лагьай медаль къазанмишна.

Вини СтIалрин хуьряй тир Авчиеврин тухум чпин баркаллу краралди, ахлакь-низамдалди машгьурбурукай сад я. И тухумдин векилри уьлкведин гьар са пипIе жуьреба-жуьре пешейрин иесияр яз кIвалахзава. Мисал яз, Авчиев Тагьирбег Агъакеримович вичин хзанни галаз Махачкъала шегьерда яшамиш жезва. Хзанда 3 велед – Жульетта, Аскер ва Дуьлбер ава. Абуруни тухумдин ад хкажзава. ИкI, Аскера 2009-йисуз Дагъустандин Государственный технический университет акьалтIарна. Дипломдин кIвалах яз ада «Моделирование противотанковой управляемой ракеты с самоноведением» тема хкяна. И темадай адахъ илимдин кIвалах давамдай фикир ава. Гьавиляй Аскер Тагьирбегович аспирантурадик экечIнава.

Хъсан, ахлакь-низам авай хзан обществодин мягькем бине хьиз, дамахни я. Шад жедай кар ам я хьи, гьар са карда чешне къалурзавай, хуьр- кIвал, общество патал менфятлу крар ийизвай хзанар чи хуьрера гзаф ава. Мукьвара Бутхуьруьз фейила, чун гьа ихьтинбурукай сад тир Муслимоврин чIехи ва гьуьрметлу хзандихъ галаз мукьувай таниш хьана.

Кьасумхуьруьн 1-нумрадин ДЮСШ-ди 1998-йисуз Эминхуьре азаддиз кьуршахар кьунай филиал ачухна. Гьадалай инихъ ана Къазахстан Республикадин лайихлу тренер А. Мегьамедкеримован ва СССР-дин спортдин мастервиле кандидат М. Мурадагъаеван гъилик цIудралди жаванри спортдин и жуьредай вердишвилер къачузва. Лагьана кIанда хьи, ина вердишвилер ва устадвал къачур са шумуд касдикай гуьгъуьнилай тIвар-ван авай спортсменар хьана. Абурукай яз кьве сеферда каратэдай Россиядин чемпион У. Ферзалиеван (вичиз регьмет хьурай), кудодай ва женгинин кукIунрай Россиядин чемпионар–стхаяр Ислам ва Муса Рамазановрин, армспортдай СНГ-дин чемпион С. Гуьлметован (вичиз регьмет хьурай), кьуршахар кьунай Москвадин чемпион Р.Мурадагъаеван ва масабурун тIварар кьаз жеда. 10-дав агакьна спортсменрикай РФ-дин спортдин мастерар, РД-дин чемпионар хьанва.