№33

Курхуьруьн юкьван школадин муаллим, РФ-дин журналистрин ва лезги писателрин Союзрин член Райсудин Набиеван тIвар «Куьредин хабарар» газет кIелза-вайбуруз фадлай лап хъсандиз таниш я. Ада кхьизвай макъалаяр, язавай шикилар чи газетдин чинриз мукьвал-мукьвал акъатзава. Саки 50 йисан тежриба авай мухбир тир Р. Набиева эхиримжи йисара эдебиятдин рекьени виликди камар къачузва. ИкI, са тIимил вахт идалай вилик Кьасумхуьрел, «Куьредин ярар» культурадин центрадин компьютеррин базада, адан Курхуьруькай ва и хуьряй акъатай баркаллу инсанрикай кхьенвай «Хуьруьн тарих» тIвар алай ктаб чапдай акъатна.

Алай йисан 21-23-августдин йикъара Канададин Монреаль шегьерда дзюдодай мастеррин арада дуьньядин чемпионат кьиле фида. Виликамаз кьунвай гьисабралди ана США-дин, Россиядин, Канададин, Франциядин, Голландиядин, Украинадин ва маса уьлквейрин командайри иштиракда. Россиядин хкянавай командадик кваз и чемпионатда майдандиз 100 килограммдин заланвиляй мастеррин арада Россиядин, Европадин ва дуьньядин чемпион Тельман Къурбанов (Кьасумхуьр) ва 13 сеферда дуьньядин чемпион Агьмедов Гьажимегьамед (+100кг. Махачкъала) экъечIда. Чи мурад абурухъ и чемпионатда агалкьунар хьун я.