Виридуьньядин дишегьлийрин рейсадвилин югъ тир 8 мартдин сувариз талукьарна, виринра хьиз, чи райондани культурадин маканра ва образованидин учрежденийра шадвилин мярекатар кьиле фена.
РДК. 5-март. И юкъуз райондин Культурадин Дворецдин банкетрин залда кьиле фейи суварин мярекатдиз чи райондин жуьреба-жуьре хилера кIвалахзавай ва чпихъ халкьдин арада еке гьуьрмет авай хейлин дишегьлийриз ва маса юлдашриз теклифнавай.
Суварин няметар алай столрихъ ацукьнавай дишегьлийриз гатфарин сифтегьан чубарук тир 8 мартдин сувар тебрик авуналди, межлис культурадин ва информациядин управленидин начальник Т. А. Рамазанова ачухна.
Анал сифте гаф гайи муниципальный тешкилатдин кьилин заместитель Гьажиагьмедов Гьажиагьмед Мегьамедовича муниципальный райондин Кьил Имам Музамудинович Яралиеван, райадми-нистрациядин ва гьакIни вичин патай межлисдин иштиракчийриз, райондин вири дишегьлийриз сувар мубарак авуна, тебрикдин хуш келимаяр лагьана.
Гуьгъуьнлай анал суварин тебрикар, чухсагъулдин гафар гваз Кьасумхуьруьн 1-нумрадин юкьван школадин завуч Саимат Селимова, ДР-дин лайихлу духтур Рима Шихрагьимова, гзаф аялар авай дидеяр тир Савзиханова Зумрият ва Мегьамедова Бесхалум, КБО-дин дерзичи Мукаилова Бикехалум, аялрин духтур Къазанбегова Сижарат, «Аленушка» ясли-бахчадин зеведиш Светлана Сайидалиева, «сельсовет Касумкентский» МО-дин секретарь Ферида Абдулмежидова, хзанриз ва аялриз яшайишдин жигьетдай куьмек гудай центрдин директордин заместитель Имара Алиева, ЦБС-дин директор Людмила Мегьамедрасулова ва эхирдайни почтадин къурулушда кIвалахзавай Сурхаева Оля рахана.
Абурун гьар садан рахунрилай гуьгъуьниз культурадин управленидин гьевескар манидарар тир Замир Мегьамедова, Навруз Исабегова, Эминуллагь Кьадиева, Агъарагьим Агъарагьимова, Селимат Гьажиевади, Замир Гьажиева чпин патай савкьват яз халкьдин рикI алай манияр багъишна.
Вечер кьиле тухузвайди тир Культурадин Дворецдин методкабинетдин зеведиш Назифа Юркъулиевади и мярекатда иштирак авур вири юлдашриз, межлис тешкилун патал куьмек гайи спонсорриз чухсагъул лагьана.
Межлисда иштирак авур дишегьлийриз суварин савкьватар яз гатфарин атир галай таза цуьквер багъишна.
Курхуьр.
8-мартдин сувар Курхуьруьн 2-нумрадин юкьван мектебдани шад гьалара къаршиламишна. И кардиз талукь яз мектебда цлан газетар, хъсандиз безетмишнавай бюллетенар акъуднавай мярекатдал вилик мектебдин директор республикадин халкьдин муаллим Н. А. Алхасов рахана. Ада кIватI хьанвайбуруз дишегьлийрин сувар мектебдин муаллимрин коллективдин тIварунихъай мубаракна, ва гьакIни и суварин тарихдикай куьрелди суьгьбетни авуна.
Суварин тебрикар гваз анал диде-бубайрин комитетдин председатель Гьажиев Эльбрус, мектебдин завуч Абдулазизов Эмируллагь, профсоюздин комитетдин председатель Шихбабаев Гьуьсейн, муаллим Гьажиева Ферида рахана.
Мярекатдиз теклифнавайбурукай анал хуьре-кIвале гьуьрмет, авторитет авай чешнелу дидеяр тир Мегьамедова Сарат, Сийидме-гьамедова Сафима, ДР-дин культурадин лайихлу работник Гьажиева Бесхалумни тебрикдин келимаяр рахана. Эхиримжида анал сувариз талукь яз вичи теснифнавай шиирар кIелна ва маниярни лагьана. Мярекатдал мектебдин аялри суварикай, дидейрикай, ислягьвиликай манияр лагьана.
Санлай кьурла суварин мярекат хъсандиз кьиле фена. Эхирдай мектебдин директорди и карда иштиракай, куьмекар авур вирибуруз чухсагъул лагьана.