Малум тирвал, РФ-дин Президент Д. Медведеван «Россиядин Федерациядин Жегьилрин йис тухунин гьакъиндай» 1383-нумрадин Указдин бинедаллаз, 2009-йис уьлкведа Жегьилрин йис яз малумарнава. Гьакъикъатдани, жегьилар гьар гьи государстводин ва обществодин хьайитIани еке такьат ва къуват я. Мадни шадвал кутадай кар ам я хьи, чи уьлкведа ва республикада хьиз, чпел дамах ийиз, чпик умуд кутаз жедай жегьилар чи райондани гзаф ава. Абурукай садакай – Магьмудов Бахтияракай заз агъадихъ куьрелди суьгьбет ийиз кIанзава.
Гьелбетда, гьар са диде-бубадин мурад чпин веледар бахтлу хьун тирди хьиз, гьар са муаллимдин мурадни вичи тарс гузвай аялрикай еке дережайрин руководителар, кIелнавай инсанар хкатун я. Акьалтзавай несилдиз чирвилер ва тербия гунин рекье гзаф йисара кIвалахзавай муаллим яз, зи рикIени гьахьтин къени ниятар ава. «Бегьерди» гуьгьуьл хкажни ийизва.
ИкI, ЦIийи поселокдин юкьван школада Магьмудов Бахтияраз зани 9,10 ва 11-классра тарсар гана. И йисара ам кIелунин, ахлакьдин, общественный кIвалахра иштиракунин рекьерай виридаз чешне тир. Са шумуд йисуз адакай классдин староста хьана.
Б. Магьмудова экстернадаказ Кьасумхуьруьн 1-нумрадин юкьван школа акьалтIарна, 2005-йисуз ам Россиядин правовой академиядин Кеферпатан Кавказдин филиалдик экечIна. Сифте йикъарилай ада академиядани лап хъсан къиметар аваз кIелзава. Гьа са вахтунда, Бахтияр илим-дин кIвалахдални маш-гъул жезва. Алай вахтунда ам политикадинни право-вой месэлайрай кхьенвай илимдин 4 кIвалахдин автор я.
2008-йисуз Б. Магьмудова Екатеринбург шегьерда, Уралдин госу-дарстводин юридический академияда кьиле фейи Вирироссиядин 6-илим-дин «Эволюция россий-ского права» конферен-цияда гъалибвал къазан-мишна.
Сад-садан гуьгъуь-наллаз, Б. Магьмудова алатай йисуз «Селегир-2008» тIвар алаз тухвай Вирироссиядин экологиядин инновационный форумда, Уралдин государстводин юридический академияда кьиле фейи 7-Вирироссиядин жегьил алимрин илимдин конференцияда, Москвада «Державинский чтения» тIвар алаз кьиле фейи илимдинни практикадин конференцияда иштиракна. Бахтияра вич дерин чирвилер, зигьин авай студент, гележег авай жегьил алим яз къалурна ва анра 1-чкаяр кьуна.
Алай йисан февралдин вацра Б. Магьмудоваз ДР-дин жегьилрин крарин рекьяй министерстводи «За особые достижения» медаль гана ва ам Дагъустан Республикада 2008-йисан лап хъсан студент яз гьисабна.
Алай вахтунда академиядин 4-курсунин студент тир Б. Магьмудовахъ, академия акьалтIарайдалай гуьгъуьниз, Москвада аспирантурадик экечIдай, илимдин кIвалах давамдай фикир ава.
Мад са кар къейд ийиз кIанзава. Мукьвара Б. Магьмудов «Сулейман-Стальский район» муниципальный тешкилатдин Кьил, депутатрин Собранидин Председатель И. М. Яралиева кьабулна. Алхишдин гафар лугьунихъ галаз санал, Имам Музамудиновича Бахтияраз Гьуьрметдин грамота, къиметлу пишкешни гана. Бахтияр, вахъ мадни ч1ехи агалкьунар хьурай.