«Сардархуьр-ДаркIуш-Къазмаяр» водовод – им районда гъиле кьунвай лап чIехи, вичихъ гьам социальный, гьам экономикадин рекьерай еке метлеб авай объект я. Анал эцигунрин кIвалахарни йигин еришралди кьиле физва. Алатай йисуз анал 37,2 миллион манатдин кIвалахар авуна.
Лугьун лазим я хьи, водовод тухун патал РФ-дин бюджетдай 95 процент, ДР-дин бюджетдай 5 процент, санлай къачурла, 300 миллион манат пул чара авунва.
Эцигунрал машгъул генераль-ный подрядчик «Атом»» ЗАО-ди, субподрядчикар тир «Касумкент-СМУ», «Горы» ва «Дагвзрывпром» ООО-ри чпин везифаяр намуслудаказ кьилиз акъудзава.
Эхиримжи вахтара, пулунин такьатар тахьун себеб яз, водоводдал кIвалахар тухунин рекьяй са жерге четинвилер ацалтзава. Райондин руководстводи алатай йисан октябрдин вацралай башламишна водоводдал арадал атанвай гьаларин гьакъиндай ДР-дин Президент, Гьукумат, экономикадин, финансрин министерствояр, республикадин МЧС-ни хабардар авуна, анриз талукь чарар кхьена. ДР-дин Президент Муху Гимбатович Алиева водоводдиз куьмек гунин месэла Гьукуматдин Председателдин заместитель Ризван Казимович Газимегьамедовал тапшурмишна.
Вичихъ еке метлеб авай водоводдал арадал атанвай гьалдихъ галаз таниш хьунин мураддалди алатай гьафтеда чи райондиз Дагъустан Республикадин Гьукуматдин Председателдин заместитель Ризван Казимович Газимегьамедов, республикадин Халкьдин Собра-нидин Председателдин 1-заместитель Николай Юрьевич Алчиев, ДР-дин экономикадин министр Алаудин Насрединович Мирзабалаев атана. Сифтедай абуру муниципальный тешкилатда «Сардархуьр-ДаркIуш-Къазмаяр» групповой водоводдал эцигунрин кIвалахар йигинарунин гьакъиндай» месэладай совеща-нида иштиракна. Ам муниципальный тешкилатдин Кьил Имам Музамудинович Яралиева ачухна ва кьиле тухвана
Вичин рахунра И. М. Яралиева къейд авурвал, «Сардархуьр-ДаркIуш-Къазмаяр» водовод гьам вилик акъвазнавай кIвалахрал, гьам вичин метлебдал гьалтайла лап зурба объект я. Ам кардик акатайла 43 километр яргъивал жезвай къаналди 65 агъзур кас хъсан еридин хъвадай целди, 2500 гектардилай виниз чилер дигидай целди таъминарда.
Алай вахтунда водоводдал эцигунринни монтаждин кIвалахар йигинарунин чарасузвал арадал атанва. И кар патал вири мумкинвилер ишлемишун лазим я. Вучиз лагьайтIа, Чирагъ вацIа яд артух хьайитIа, водоводдал авунвай кIвалахар вацIу тухунин къурхуллувал арадал къвезва. Гьавиляй объектдал талукь кIвалахар алай йисан 20-апрелдалди тухвана акьалтIарун чарасуз я.
И. М. Яралиева къейд авурвал, водоводдал кIвалахар тухун патал мартдин вацра 33,2 миллион манат, гуьгъуьнилай – майдин вацралди мадни 33,6 миллион манат пул чара авун лазим я.
Совещанидал и месэладай Н. Ю. Алчиев, Р. К. Газимегьамедов, райондин администрациядин Кьил Ш. Гь. Мегьамедханов рахана. Абуру Имам Музамудиновичан тереф хвена, водоводдин эцигунриз тади гьалда пулунин такьатар ахъаюн лазим тирди къейдна.
Совещанидилай гуьгъуьниз Махачкъаладай атанвай жавабдар работникар, Хив ва Кьурагь районрин руководи телар, И. М. Яралиев, Ш. Гь. Мегьамедханов, райондин депутатрин Собранидин Председателдин заместитель Н. Ш. Абдулмуталибов «Сардархуьр-ДаркIуш-Къазмаяр» водоводдин эцигунрал фена, анал арадал атанвай гьал-дихъ галаз таниш хьана. Абуруз райондин руководстводи гъиле кьунвай кIвалахди екез таъсирна.
-Чун иниз Дагъустан Республикадин Президент Муху Гимбатович Алиеван теклиф-далди атанвайди я, - лагьана чаз республикадин Гьукуматдин Председателдин заместитель Р. К. Газимегьамедова. – Райондин руководстводи вичихъ еке метлеб авай кIвалах гъиле кьунва. Чаз акурвал, са куьруь девирда водоводдал еке кIвалах тухванва. Чкадал атана арадал атанвай гьал акурла чун райондин руководстводи ийизвай истемишунар бине авайбур, гьахълубур тирдахъ инанмиш хьана. Вахтунда кIвалахар акьалтIар тавуртIа, водоводдал авунвай кIвалахар селлери тухунин къурхуллувал амукьда. Умудзава хьи, Дагъустан Республикадин Президентдин, Гьукуматдин, талукь министерствойрин патай талукь куьмек агакьда.
-Гьакъикъатдани, водоводдихъ социальный рекьяй хьиз, экономикадин жигьетдайни еке метлеб ава, - лугьузва ДР-дин экономикадин министр А. Н. Мирзабалаева. – Анаг акьалтIа-райла Чирагъ вацIун цикай неинки Сулейман-Стальский, гьакI Хив, Табасаран, Кьурагь районрин гзаф агьалийривай, карханайривай менфят къачуз жеда. Дигидай яд тахьун себеб яз, эхиримжи вахтара карханайра виш гектарралди чилер баябан яз амукьайди заз чизва. КIварчагъ дереда гзаф майданар ракъини кана алугарайди, уьзуьмлухарни багълар терг хьайиди заз жуван вилералди акунай. Гьавиляй и водовод эцигунин тереф республикадин руководстводи, кьилди къачуртIа чи министер-стводини хуьзва.
Водоводдикай, анал эцигунар кьиле физвай гьалдикай, арадал атанвай гьаларикай чна Имам Музамудинович Яралиевавай са-кьве гаф лугьун тIалабна.
- Сифтедай заз водоводдал кIвалахзавай пешекарриз, устIарриз чухсагъул лугьуз кIанзава, - лагьана чаз И. М. Яралиева. – Вахт-вахтунда пул гуз жезвачтIани, маса четинвилер гьалтзаватIани, абуру хъсандиз, югъ-йиф лугьун тавуна, кIвалахзава. КIвалахар планла-мишнавайдалай артухни алаз авунва. Гила, апрелдин вацран юкьваралди, вацIун сив кьун, анал дамбаяр эцигун чарасуз я. Яд атайла, вацI хкаж жезвайди я. Гьавиляй водоводдин бинеда авунвай чка селди тухунин къурхуллувал ава. И кар Гьуку-матдин делегациядизни чпин вилералди акуна. Водоводдин кIвалахриз 32 миллион манат пул ганва, мад 33 миллион манат герек жезва. Республикадин руководстводи и кьадар пул гудайдахъ чаз инанмишвал ийиз кIанзава.
Чна винидихъ лагьайвал, водоводдин генеральный подрядчик «Атом» ЗАО я. Анин кьилин инженер Тельман Гьасанова чаз лагьайвал, алатай йисан ноябрдин вацралай анал кIвалах-завайбуруз мажибар ганвач. ЯтIани, устIарри кIвалахзава. Алай йисан кьве вацран вахтунда эцигунардайбуру чкадал пул алачиз 60 миллион манатдин кIвалахар тамамарнава. КIвалах давамни ийизва.
Водоводдал фена, авунвай, хъувуна кIанзавай кIвалахрихъ галаз таниш хьайила, республикадин меркездай атанвай жавабдар работникар эцигунрин кIвалахар давамарун патал чарасуз пулунин такьатар чара авун лазим тирдан фикирдал атана. И теклиф абуру ДР-дин Президентдин, Гьукуматдин виликни эцигда.