Сулейман-Стальский район Республики Дагестан
www.old.suleiman-stalskiy.ru

КIвалахдилай рази я

Лугьуда хьи, рикI алай пешеди инсандин руьгь тухарда, кIвалахдани адахъ агалкьунар жеда.
Алкьвадрин хуьряй тир Агьмедов Абилни рикIин эмирдалди садра хкягъай пешедиз вафалувал къалурзавай инсанрикай сад я. Ада 1984-йисуз Ставрополдин алакъадин электротехникадин техникум акьалтIарна, армиядин жергейра къуллугъна.
1988-йисалай инихъ А. Агьмедова Алкьвадрин хуьруьн алакъадин отделенидин начальниквиле кIвалахзава. И отделениди Алкьвадрин ва Сардархуьруьн агьалийриз къуллугъзава.
Чун инанмиш хьайивал, А. Агьмедова вичин хиве авай везифаяр агьалияр рази жедайвал кьилиз акъудзава. Агьалийрал газетарни журналар, кагъазарни маса корреспонденцияр вахт-вахтунда агакьарун патал чалишмишвал ийизва.
-Абил кIвалахдин гъавурда авай, вичин кIвалах жавабдарвал гьисс авуналди кьилиз акъудзавай пешекар я, - лугьузва пенсионер, зегьметдин ветеран Эмрягьов Абдуселима.
Алай йис патал алакъадин отделенида 70-дав агакьна «Лезги газет», «Куьредин хабарар» газетар, 40 «З0Ж» журнал ва маса изданияр подписка авунва. А. Агьмедова чаз лагьайвал, мумкинвилериз килигайла, кхьенвай газетринни журналрин кьадар тIимил я.
- Са рахунни алачиз, чна алай йисан кьвед лагьай пай патал гьам жуван милли чIалал акъатзавай, гьакI республикадин ва центральный газетринни журналрин кьадар артухарда, - лугьузва А. Агьмедова. – И кар патал чна халкьдин арада кIвалах тухузва.
 

Адрес статьи: http://old.suleiman-stalskiy.ru/?com=articles&page=article&id=891