«Россиядин Федерацияда чкайрал чпи-чеб идара авун тешкилунин умуми къайдайрин гьакъиндай» РФ-дин Закон уьмуьрдиз кечирмишунин мураддалди, гзаф маса чкайра хьиз, чи райондани «сельсовет Касумкентский» муниципальный тешкилатдин администрациядин патав МУП ЖКХ «Касумкент» тешкилна 1-апрелдиз са йис тамам жезва. Яран суварин вилик чи махсус корреспондент и карханадин директор – «сельсовет Касумкентский» МО-дин кьилин заместитель – Мамедяров Фазил Алимирзоевичахъ галаз гуьруьшмиш хьана ва адавай вич кьиле акъвазнавай карханадин везифайрикай, кьиле тухузвай кIвалахрикай суьгьбет авун тIалабна. Агъадихъ чна адан суьгьбет гузва.
Куьруь справка: Ф. А. Мамедяров 1958-йисуз Кьасумхуьрел къуллугъчидин хзанда дидедиз хьана. 1977-йисуз ЦIийи поселокдин юкьван школа акьалтIарна. 1984-йисуз ДГУ-дин экономический факультет куьтягьна. Махачкъалада 25 йисуз федеральный агрохимслужбадин директордин заместителвиле кIвалахна.
2000-йисалай чи районда райгаздин абонентдин къуллугъдин начальник яз, статистикадин районрин уртах С. Стальский отделда кьилин пешекарвиле кIвалахна. 2008-йисан 1-апрелдилай ЖКХ «Касумкент» МУП-дин директор я.
Ам ДР -дин лайихлу экономист, зегьметдин ветеран, агьалийрин эхиримжи перепись тухуна активвилелди иштирак авунай ганвай медалдин сагьиб я. Адахъ хзан ава.
-Эхь, 1-апрелдиз чи кархана тешкилна са йис тамам жезва. Карханада вири 16 касди кIвалахзава. Абурукай 11 кас Кьасумхуьруьн поселенидик акатзавай сергьятда михьивал хуьнал, зирзибил гадарунал машгъул я. Чахъ яшайишдин амукьаяр гадардай са машинни ава. Адан куьмекдалди гьар юкъуз пуд-кьуд рейс ийиз, 30 кубометрдин кьадарда амукьаяр махсус чкадиз тухузва. Рабочийри гьар .юкъуз 8400 кв.м. майданар михьзава. Чпин везифаяр намуслувилелди кьиле тухузвайбурун жергедай яз Абумуслимов Нурдинан, Ламетова Маперидин, Гьуьсенбегова Раижатан ва масабурун тIварар кьаз жеда.
Чи контролерри абурун кIвалахдал, хуьрера михьивал, къайда хуьнал гуьзчивал ийизва, агьалийрин ва гьакIни юридический ксарин арада гъавурда тунин кIвалах тухузва. Истемишунрал ва къайдайрал къастунай амал тийизвайбурун гьакъиндай талукь серенжемар кьабулзава.
Эхь, агьалийрин асул пай и жигьетдай дуьз гъавурда акьазватIани, са бязибуру чи истемишунрал амал ийизвач ва чпин яшайишдин кIвалерин, туьквенрин вилик квай чкаяр михьзавач.
Гьар са хзандани гьакI я: садавай, вич цавай фидайди хьайитIани, кIвале михьивал, къайда хуьз жедач, и кардал гьар сад машгъул хьун лазим я.
Гьелбетда, авазва чахъ чпелай чешне къачудай кьилдин ксарин, туьквенарни. Мисал яз, райцентрадал алай «Золотое кольцо», «Тысяча мелочей», кьилдин карчи Алиметова Фаинадин ва гьакIни ЦIийи поселокда эцигнавай са жерге цIийи туьквенар. Абурун иесийри чпин кIвалах девирдин истемишунриз жаваб гудайвал эцигнава, михьивал хуьз алахъзава.. Вучиз чна чун авай куьче, хуьр масадбурув кьацIуриз, чиркинариз тазва? Кьасумхуьр – чи хуьр, чи гьар садан кIвал я. Ана къайда, михьивал хуьн чи гьар садан буржи я.
Чи халкьдин рикI алай суваррикай сад тир Яран сувар алукьунихъ галаз алакъалу яз чна михьивилер авунин жигьетдай са жерге кIвалахар кьиле тухвана. Амма хъувуна кIанзавай кIвалахарни гзаф ама.
Алай вахтунда чна вирида майдин вацра кьиле фидай Дагъустандин халкьдин шаир СтIал Сулейманан 140 йис тамам хьунин юбилейдиз гьазурвилер аквазва. Гьавиляй чи гьар садан кIвал, куьче ва хуьр михьивилин, адалатдин чешне хьун лазим я.
Гьа са вахтунда чавай, Кьасумхуьруьн сергьятда чка-чкадал яшайишдин кIеви амукьаяр вегьедай контейнерар эцигна, зирзибил тайинарнавай чкадиз гадарзаватIани, авай гьалдал разивал ийиз жедач. Са бязибуру гъиз а контейнеррин патав салай акъудай буранрин, помидоррин кьенерар, обрезка авур тарарин, цуькверин валарин хилерни, чарчин коробкаярни кваз гадарзава. Я гьуьрметлубур, ибур вири салан са пата кIватIна, цIай яна кудай шейэр я. А руьхъни багъ, бустан миянарун патал гзаф хийирлу затI я эхир. Са бязибуру, лагьайтIа, кIвале кIватIай зирзибил машиндаваз тухвана какатай чкадал вегьезва ва я мешокда, пакетда туна куьчедин къерехда яд физвай хуьлез, цацариз гадарзава. Агьалийри нехир хуьдай чка авач лугьуз шел-хвал ийизвай ЦIийи поселокдин «Ашиман кьерез» физвай сурарихъ галай рекьин къерехар, виликан очистительный сооруженидал фидалди авай рекьелай вацIухъди тир гуьнедиз (виликдай малари незвай чкайриз) гадарнавай кьван зирзибил акур касдиз кьагьур къведа ва икI мад.
Чун, лезгияр, къадим тарих, меденивал авай, чпелай масадбуру гьар са карда чешне къачур халкь я. Бес гьиниз фена чи меденивал, чи лезги намус?! Чун гьеле муькъвелай алудиз гадарзавай мегьежрикай, плиткайрикай, хазвай чахчахрикай, тарарикай, рахазвач…
Ша чна чи виридан умуми кIвал тир Кьасумхуьрел михьивал ва къайда хуьн. Им чи гьар садан буржи я.