20-мартдиз райондин центральный библиотекадин кIелдайбурун залда, гьар йисуз хъсан адет хьанвайвал, Яран сувариз ва гьакIни Виридуьньядин шииратдин йикъаз талукьарнавай шадвилин межлис кьиле фена. Ам библиотекадин работникри «Куьредин ярар» культурадин центрдин комитетдихъ ва ЛПС-дин райотделенидин бюродихъ галаз санал тешкилавайди тир.
Аниз чи райондин экономикадин гьар хилера, гьакIни образованида, здравоохраненида, культурада кIвалах авур ва кIвалахзавай хейлин юлдашриз, шаирриз ва манидарриз теклифнавай.
Яран сувариз гьазурдай гьар няметривди безетмишнавай столрихъ ацукьнавай мугьманар, вирибуруз Яран сувар, Виридуьньядин шииратдин югъ ва гьакIни 25-мартдиз къейд ийидай культурадин работникрин югъ мубарак авуналди, ЦБС-дин директор Людмила Мегьамедрасуловади ачухна.
Яран суварин тарихдикай ва ам кьиле тухунин адетрикай куьруь суьгьбет гваз анал библиотекадин къуллугъчи – абонентрихъ галаз кIвалах тухудай отделдин зеведиш – Назиля Шихбабаева рахана.
Шадвилин межлисдал тебрикдин хуш келимаяр ва чпин шиирар гваз шаирар тир Сажидин Саидгьасанов, Гьуьсейн Гьуьсейнов, Абидин Камилов, Багьадин Къурдулов, Светлана Шабанова, «Куьредин ярар» культурадин центрдин регьбер Агьмедпаша Агьмедпашаев ва маса юлдашар рахана.