Сулейман-Стальский район Республики Дагестан
www.old.suleiman-stalskiy.ru

Райцентрдал Яран суварин шадвилер

21-мартдиз райцентрдал, Ленинан тIварунихъ галай майдандал, лезги халкьдин къадим ва рикI алай Яран сувариз талукьарнавай шадвилер кьиле фена.
Майдандал виликамаз «Яран сувар мубаракрай!» лозунгни яна, гьевескар артистар экъечIдай махсус сегьне туькIуьрнавай ва адан вилик и суварин кьилин лишан тир Яран цIай хъувун патал кIарасарни гьазурнавай.
Гьар йисуз хъсан адет хьанвайвал, и йикъан нисинрилай алатайла майдандал, кIеретI-кIеретI хьана, аялар, жегьилар ва чпин хтуларни галаз атанвай чIехи диде-бубаярни кIватI хьана.
Сифте суварик атанвайбурун вилик  чпи гьазурнавай концертдин чIехи программа гваз райондин аялрин музыкальный школадин ва аялрин яратмишунрин КIвалин жегьил гьевескарар-музыкантар, манидарар ва кьуьлердайбур экъечIна. Абурун гзаф нумраяр тамашачийри хушвилелди кьабулна.
Гуьгъуьнлай суварин иштиракчийрин, иллаки аялрин, гуьгьуьлар цавун пагьливанди ва адахъ галай «цIегьре» мадни шадарна.
Са арадилай и йикъан къайи гьава майдандал Яран цIай хъувурла хейлин умун хьана.
Райондин Культурадин Дворецдин ва гьакIни теклифнавай маса гьевескар артистрин куьмекни галаз гьазурнавай суварин концертдин программадин кьвед лагьай пай аялрин музыкальный школада тербия къачузвай далдамчийрин дестеди тамамарай дагъларин туьнт везинрилай башламиш хьана.
Концертдин программадин 2-пай кьиле тухузвайди тир шаир ва журналист Абидин Камилова и суварикай куьруь ихтилат авурдалай гуьгъуьниз районэгьлийриз Яран сувар тебрик авун патал сифте гаф муниципальный райондин администрациядин кьилин 1-заместитель Агьмедов Мусаиб Гьажибалаевичаз гана. Куьруь гаф рахайдалай гуьгъуьниз, ада суварин иштиракчийриз ва вири районэгьлийриз райондин руководстводин ва гьакIни вичин патай гатфарин и гуьзел сувар мубаракна, тебрикдин хуш келимаяр лагьана.
Межлис тухузвайди тир А. Камилова, вичи и сувариз талукьарна кхьенвай «ЦIаярин сувар» шиир кIелайдалай гуьгъуьниз, гаф «сельсовет Касумкентский» МО-дин кьил Бремов Брем Керимовичаз гана.
Адани вичин патай суварин иштиракчийриз, Кьасумхуьруьн муниципальный поселенидик акатзавай хуьрерин жемятриз ва вири районэгьлийриз и гуьзел сувар мубаракна, тебрикдин хуш келимаяр лагьана.
Концертдин программадик Культурадин Дворецдин гьевескар манидарар тир Эминуллагь Кьадиева, Тофик Мегьамедова, Агъарагьим Агъарагьимова, Замир Гьажиева, Навруз Исабегова, Селимат Гьажиевади лагьай манияр, «Кюре» фольклордин коллективдин Шихидхуьруьн зонадин рушарин дестеди лагьай лезги халкьдин манияр, зуьрнечийрин дестеди тамамарай лезги макьамар (попури) ва маса  нумраяр квай.
Яран суварин межлис гурлу хьуник гьакI аниз атанвай мугьманар тир «Алмаз» группадин манидар Телли Къарибовади, «Майдан» группадин манияр лугьузвайди тир Диана Гьажиевади, «Ходжа» группадин манидарар – Эрлин Асланова, Жамидин Керимова ва гьевескар манидар Луиза Къафлановади чпин пайни кутуна.
Суварин шадвилер югъ няни жедалди давам хьана.

Адрес статьи: http://old.suleiman-stalskiy.ru/?com=articles&page=article&id=883