Ингье, гатфарин юкь тир апрелдин варзни алукьнава. Ам хуьруьн майишатдин кIвалахар кьиле тухун ва санлай агьалияр патал гьихьтинди жеда?
Дагъустандин гидрометстанцияди хабар гузвайвал, юкьван гьисабдалди вацран температурадин чимивили 11-13 градус тешкилда, дагъдин районра ам 8-10 градусдив агакьда. Им алатай гзаф йисарин и вахтунин юкьван гьисабдив гекъигайла 1-2 градусдин артух я.
Гьавадин агъуз тир температура вацран сифтегьан декадада, яни 10-числодалди жеда. Йифен вахтара гьавадин чимивили и йикъара 0-5 градус тешкилда, дагълух районра 1-6 градусдин мекьивилер жеда.
Вацран 3-декадада, яни 20-числодилай гуьгъуьниз гьавадин температура 25-30 градусдив агакьна чими жеда.
Гьа са вахтунда и вацра къвалрин кьадарди нормадилай артух хьиз, яни 15-35 миллиметр, дагълух районрани 35-50 миллиметр тешкилда.
И варз хуьруьн майишатдин чуьлдин кIвалахар кьиле тухун патални къулайди жеда. Вацран сифтегьан паюна фад жедай картуфар цаз жеда. Вацран эхирдиз накьв гьажибугъдаяр цадайвал чими жеда.
И вацра саки вири емиш тарари цуьк ийида.
Санлай кьурла, апрелдин варз къулайди жеда.