Сулейман-Стальский район Республики Дагестан
www.old.suleiman-stalskiy.ru

Хабар кьадай вахт атанва

Алай вахтунда Россиядин Президент Д.Медведева чи уьлкведа халкьдин дуланажагъ хкаж хьун, абурун кьадар артух хьун патал са жерге программаяр  кьабулнава. Абурукай сад яз чавай Президентдин «Россиядин аялар»(целевая программа «Дети России») лугьудай программа къейд ийиз жеда.
Амма къвезвай несилдин кьадар артух гьикI жеда, адаз къулай шартIар яратмиш тавурла? Герейханован тIварунихъ галай  совхоздин кьвед лагьай отделенида гьихьтин хъсан аялрин бахча авай, амма ам виликан «Дуствал» колхоздин председатель М.Дадашева вичиз 30 агъзур манатдай приватизировать авуна.
Алай вахтунда «Герейхановский» ООО гьукуматдиз 6 млн. манат пул буржлу я. Вири халкьдин пай квай совхоздин эменни: ферма, складар, конторар, гьамамар, пекарня, гараж ана  авай техникани галаз, вара- зара авуна.
Ватандин ЧIехи дяведа кечмиш хьайи хуьруьнвийриз эцигнавай обелискдин патав гьеле рагьмет хьайи М.А.Бачханова кутур гьихьтин хъсан парк гвай. Амма  и парк (масана кIвалер эцигиз гудай чилер аватIани) кьилдин ксариз апайна, маса гана. Хуьруьн администрациядин кьил Гьажимегьамедов Абдурагьмана лугьузвайвал, хуьре кIвалер эцигиз кIанзавай жегьил хзанрин кьадар  270- дахъ агакьнава. Амма абуруз гудай чилер исятда амач.
Совхоздиз виликдай халкьдиз къулай шартIар яратмишдай вичиз халкьди гилани «быткомбинат» лугьузвай хъсан кьве мертебадин идара авай. Адаз халкьди гилани «быткомбинат» лугьузва. Ана парикмахерская, кIвачин къапар хъийидай, мес-яргъан, парталар цвадай ва маса жуьредин халкьдиз къуллугъ ийидай чкаяр авай. Гила кьамар кьун, кIвачин къапар ремонт хъувун патални Кьасумхуьрел фена кIанзава!
Са шумуд йис идалай вилик и «быткомбинатдин» идара Герейханован сад лагьай нумрадин юкьван школадив вахканвай. Ам хъсан кIвалах хьанвай, ахкун тавунайтIа, гьамани садан кIвализ элкъведай. Иниз сифтегьан школа акъуддай фикир хьана. Лап хъсан фикир тир, вучиз лагьайтIа, гъвечIи классра кIелзавай аялриз кьвед лагьай сменадиз къвез-хъфиз лап четин жезва, иллаки хъуьтIуьн вахтунда. Амма иесисузвилин нетижада виликдай гуьзел и дарамат халисан «харапIадиз» элкъвенва. ГьакI ятIани, школадин руководстводи и рак- дакIар кумачир дарамат хуьн патал кьилдин къаравул кьунва. КIанзни- такIанз суал къвезва: и къаравулди вуч хуьзвайди я? Ина хуьдай са мал- девлетни авач эхир!? Эгер вад йисан вахтунда къаравулдиз ганвай пулунин кьадар гьисабайтIа, а пулунихъ и дараматдал мишреб хкиз жедай: аник рак- дакIар кухтаз, пол- потолок ягъиз хъижедай. Амма…
Виликдай Герейханован тIварунихъ галай совхоз неинки Дагъустанда, гьакIни вири Россияда машгьур тIвар- ван авай майишатрикай сад тир. Амма эхиримжи йисара кьиле фейи вакъиайрин нетижада Герейханован хуьр ва майишат алай вахтунда районда культурадин ва дуланажагъдин рекьяй лап агъада ава лагьайтIа, чун гъалатI жедач.
Совхоз чкIайла, ам кьве патал пай хьана. Сад лагьай отделенида ООО «Герейхановский», кьвед лагьай отделенида,- колхоз «Дуствал» арадал атана. ООО «Герейхановскийдиз» 175 млн. манат пулунин пай атана. «Дуствал» колхоздиз- 27 млн. манатдин пай. И пулуникай халкьдиз хьайи гьич са хийирни авач.
Бязибуруз я закондикай, я Аллагьдихъай кичIезмач.
Вири жемятдин тIалабун ам я хьи, аялрин бахча Герейханован 2-отделенида арадал хкана, ам кардик кутун, 1-отделенида эцигиз эгечIай аялрин ясли-бахчадин дарамат акьалтIарун, виликан быткомбинатда сифтегьан школа ахъагъун.
Тахсиркаррив жаваб гуз тадай вахт фадлай алукьнава.
 

Адрес статьи: http://old.suleiman-stalskiy.ru/?com=articles&page=article&id=870