Чи уьлкведин руководстводи ва Гьукуматди аялрин гьакъиндай къайгъударвал авуниз йисалай-суз артух фикир гузва: диде дишегьлияр патал са жерге кьезилвилер (материнский капитал, санал ва гьакI гьар вацра гузвай пулдин пособияр, тайин вахтуналди аялрихъ гелкъуьнай гузвай пул ва масабур) тайинарнава.
Чи райондани чи экуь гележег тир аялрин гьакъиндай «Россиядин аялар» махсус программа уьмуьрдиз кечирмишунин мураддалди са жерге серенжемар кьабулзава. И жигьетдай яз школаяр патал махсус автобусар чара авун, гъвечIи классрин аялриз чими тIуьнар гун тешкилун, аялрин ясли-бахчайрин кIвалахдиз кьетIен фикир гун ва маса кIвалахар къалуриз жеда.
Алай йисан 1-апрель – хъуьруьнринни зарафатрин югъ – ЦIийи Макьарин хуьруьн тарихда лишанлуди ва хуьруьнвийрин рикIел яргъалди аламукьдайди хьана: и юкъуз хуьре «Улыбка» тIвар алай аялрин ясли-бахча шад гьалара ачухуниз талукьарнавай мярекат кьиле фена.
Хуьруьн рабочийриз ва къуллугъчийриз кIвалахда къулайвал яратмишун патал виликан «Зардиянский» совхоздин руководстводи гьеле 1977-йисуз ЦIийи Макьарал аялрин ясли-бахча эцигнай ва кардик кутунай. Гуьгъуьнлай адакай гъвечIи классрин аялрин кIелдай школадин дарамат авуна.
Алай йисан 1-январдилай, лагьайтIа, анаг мад аялрин ясли-бахчадиз элкъуьр хъувуна. Эхь, девирдин истемишунар я.
Вичихъ галаз авур суьгьбетда ясли-бахчадин зеведиш Мирзоева Зарефа Агьмадовнади къейд авурвал, алай вахтунда ана, 3 группадиз чара авуна, 52 аялди тербия ва сифтегьан чирвилер къачузва. Абурухъ вад кас тербиячияр ва 5 няня гелкъвезва, гьакI маса къуллугъарни ава.
- И дарамат чна чи работникрин куьмекни галаз йисан сифтедилай ремонт ийиз эгечIна ва къайдадиз гъана, - лагьана ада. – 5600 касдихъ агакьна агьалияр яшамиш жезвай чи хуьруьн администрациядин сергьятда ясли-бахча ачухунин чарасузвал гьеле фадлай алукьнавай. Аниз чпин аялар кьабулун патал чаз арзаяр ганвайбурун кьадар мад са виш касдихъ кьван агакьнава.
И шадвилин мярекатда иштирак авун патал райондайни администрациядин, РУО-дин векилар, райондин газетдин ва телевиденидин работникарни атанвай. Дараматдин вилик квай гьаятда аялар, абурун диде-бубаяр ва атанвай маса мугьманар кIватI хьанвай.
Шадвилин мярекат, куьруь гаф рахуналди, хуьруьнвийриз и шад вакъиа мубарак авуналди, РУО-дин начальникдин заместитель Къ. А. Аминова ачухна ва сифте гаф райадминистрациядин кьилин заместитель Гь. М. Гьажиагьмедоваз гана.
Гьажиагьмед Мегьамедовича алай и четин шартIара чи районда аялрин цIийи ясли-бахча ачухун шад жедай кар ва лишанлу вакъиа тирди, аялрин гьакъиндай и месэладиз чи уьлкведин руководстводини еке фикир гузвайди къейдна. Ада аялрин ясли-бахча арадал хкунин месэладиз райондин руководстводини разивал гайиди ва инлай кьулухъни ихьтин хъсан крариз вири жуьредин куьмекар гудайди лагьана. Эхирдай ада муниципальный райондин Кьил Имам Музамудинович Яралиеван, адан администрациядин ва гьакIни вичин патай ЦIийи Макьарин жемятдиз и шад вакъиа мубаракна, хуш келимаяр лагьана.
Гуьгъуьнлай анал разивилин хуш келимаяр ва тебрикдин гафар гваз и хуьруьн МО-дин кьил Асамудин Къазиагьмедов, райондин Собранидин депутат Ямудин Агьмедов, хуьруьн юкьван школадин директор Мирземет Салманов, диде-бубайрин патай школадин завуч Рамиз Идрисов ва эхирдайни ясли-бахчадин зеведиш Зарефа Мирзоева рахана.
Шад гьалара яру лента атIайдалай гуьгъуьниз райондай атанвай векилар ва хуьруьн, школадин руководителар, маса мугьманар ясли-бахчада кIвалах тешкилнавай гьалдихъ галаз таниш хьана.
И шадвилин вакъиадиз талукьарна гуьгъуьнлай анал кIватI хьанвайбуруз хуьруьн школадин аялрихъ галаз санал культурадин КIвалин гьевескар артистри гьазурнавай концертдин программа къалурна.