ГЬУЬРМЕТЛУ СУЛЕЙМАН-СТАЛЬСКИЙ РАЙОНДИН АГЬАЛИЯР!
Квез чизвайвал, эхиримжи вахтара районда чун элкъуьрна кьунвай гьакъикъатда дуьзгуьн гьалар арадал хкунин, хуьрер аваданламишунин, санитарно-эпидемиологический гьал хъсанарунин жигьетдай тIимил кIвалахар авунвач.
Чи хуьрер аквадайвал михьи хьанва, чиликай дуьз менфят къачунин месэлайра къайда твазва, дигидай цин къаналар михьзава, рекьер къайдадик кутазва. Амма хъувуна кIанзавай кIвалахар мадни гзаф ама.
Вири хуьрера яшайишдин эцигунарзавай чкайра виринра гзаф кьадар ихтияр таганвай зирзибил гадардай чкаяр арадал атанва. Абурун зиянлу (токсический) амукьайри чна нефес чIугвазвай гьава, чилин винел алай ва чиликай физвай ятар чиркинарунал гъун мумкин я. Ихтияр авачиз, чпи-чпиз, чилин участокар кьун, иллаки рекьерин къерехар тирвал, давам жезва.
Малар, лапагар тукIвадай чкаяр тайинарнавач ва закондив кьадайвал и кар тешкилнавач, недай продуктралди куьчейрал алвер авун арадай акъуднавач. Алишверишдин, общественный тIуьнрин карханайрихъ, школайрихъ, аялрин школадилай вилик квай идарайрихъ чпин хсуси зирзибил гадардай чкаяр, урнаяр авач.
Хуьрерин поселенийрин кьилери, общественный, ветеранрин организацийри, педагогвилин коллективри санитарный законодательство уьмуьрдиз кечирмишунин жигьетдай герек тир серенжемар кьабулзавач, абурун патай хуьрера михьивилер авунихъ, амукьаяр, зирзибил гьялунихъ ва кIевирунихъ галаз алакъалу месэлаяр гьялунин жигьетдай агьалийривай ва организацийривай истемишун агъузди яз ама.
Гьуьрметлу районэгьлияр!
И арадал атанвай гьаларихъ галаз алакъалу яз чна распоряжение акъуднава. Ана апрель ва май варцара гьар киш юкъуз вири хуьрера михьивилер авунин, сергьятра аваданламишунин, дигидай цин къаналар михьунин, яшайишдин амукьаяр гадарунин общественный кIвалахар тешкилун ва кьиле тухун фикирдиз къачунва. И месэлаяр иллаки ДаркIуш-къазмаяр – Сардархуьр шегьре рехъ тирвал рекьин кьве пата авай чиликай менфят къачунин карда къайда туниз талукь я.
Зун чи райондин вири агьалийрихъ, агъсакъалрихъ, чи ветеранрихъ, организацийрин ва идарайрин руководителрихъ, педагогвилин коллективрихъ, чи чIехи классрин аялрихъ элкъвена рахазва ва сергьятар аваданламишунин, чун элкъуьрна кьунвай тIебиат хуьнин жигьетдай общественный кIвалахра виниз тир активвал аваз иштирак авуниз эвер гузва.
Гьич са касдини паталай атана чи куьчеда михьивилер ийидач, чи кIвале къайда чна туна кIанда.
Хуьрерин муниципальный тешкилатрин кьилери субботникар тешкилунин жигьетдай асул серенжемар тайинарун, чарасуз тир инвентарь къачун герек я.
Субботникар кьиле тухунин кардал гуьзчивал тухун патал гьар са хуьруьн тешкилатдихъ, графикдин бинедаллаз, администрациядин кьилин заместителар, отделрин ва управленийрин руководителар галкIурнава.
Умудлу я, чалай виридалай санал чи кIвале къайда тваз, ам михьи ва гуьрчег ийиз, уьмуьр къулайди ийиз алакьда.