Дагъустандин амай халкьариз хьиз, Кавказдин албанрин, Шарвилидин невеяр тир лезгийрини гьар девирра вичин къулан цIай, аслу туширвал хуьн патал душманрихъ галаз кьиле фейи къати женгера халис игитвилин чешнеяр къалурна. Абурукай гзафбурун тIварар къенин юкъузни къадирлу невейри пакдаказ рикIера хуьзва, багьа ядигарар хьиз, гележегдин несилрал агакьарзава. Ихьтин регьберрин арадай яз Шарвилиди, Шаргиран, Вечедин, Куьре Меликан, Гьажи Давудан ва масабурун тIварар кьаз жеда. Эхь, и ислягь девирдани чахъ чи гьукуматдин са бязи чIехи къуллугърал алай чиновникрин саймазвал себеб яз, са бинени авачиз кьве патал чара авунвай лезги халкь сад хъувун патал майдандиз экъечIзавай, адан гележегдикай фикирзавай, адан къайгъуда авай халкьдин векилар – регьберар авачиз туш. (Къуй и пак карда чпиз Аллагьдини нуьсрет гурай. Амин!)
Ихьтин регьберрихъ, машгьур алимрихъ ва зарийрихъ галаз сад хьиз, чахъ алай девирдани чи халкьдин тIвар виниз хкажзавай са жерге бажарагълу спортсменарни ава. Ахьтинбурун жергедай яз чаз къе, лезги халкьдин «Шарвили» игитвилин эпосдин суварин вилик, чпин бине чи райондин Алидхуьрелай тир, чпин арадай (самбодай ва дзюдодай) кьве кас дуьньядин чемпионар акъатнавай, бажарагълу спортсменар ва тренерар тир Къурбановрин хзандикай, кьилди къачуртIа, вич аялриз чирвилер гузвай тренерни яз жуьреба-жуьре чемпионатра ва турнирра пешекар спортсменрин (мастеррин) арада кьиле физвай акъажунра иштирак ийиз, чIехи наградаяр ва тIварар гваз хуьквезвай дзюдодай дуьньядин ва Европадин чемпион Къурбанов Тельман Ибрагьимовичакай кьве гаф лугьуз кIанзава.
Сифте нубатда заз мадни а кар къейд ийиз кIанзава хьи, стхаяр-тренерар тир Рамазан (ам самбодай мастеррин арада дуьньядин чемпион я), Юрий ва Тельман Къурбановрин чалишмишвилерин нетижада чи районда са 10 йисан идалай вилик дзюдодай ва самбодай аялринни жаванрин махсусламишнавай спортшкола ачухна. Алай вахтунда 3-нумрадин и ДЮСШ-дихъ (директор Къурбанов Рамазан Ибрагьимович) неинки са чи районда, гьакI къунши районрани чпин филиалар ава. Абурун гъилик вердишвилер къачузвай жаванрин нетижайри чун шадарзава. Абурун арада ДР-дин, Россиядин чемпионар, ЮФО-дин, Россиядин ва гьакIни международный турниррин призёрар ава.
Къурбанов Тельман 1969-йисуз Кьасумхуьрел (Алидхуьр) дидедиз хьана. Гьеле школада кIелзамаз ам азаддаказ кьуршахар кьунал машгъул жез хьана. Адакай са шумуд сеферда райондин чемпионни хьана. Гуьгъуьнлай Уральский политехнический институтдик кIелиз экечIайла ам ана дзюдодал машгъул жез хьана. Алай вахтунда ам Кьасумхуьруьн 3-нумрадин ДЮСШ-дин завуч ва тренер я. Адахъ самбодай ва дзюдодай агъадихъ галай нетижаяр ава: Свердловский областдин чемпионат (1988-йис)- 2-чка; самбодай ДР-дин чемпионат (2003-йис)- 1-чка; мастеррин арада дзюдодай СНГ-дин чемпионат – 2-чка; мастеррин арада дзюдодай Дуьньядин чемпионат (Франция – 2006-йис) – 1-чка, (Бразилия – 2007-йис) – 3-чка, (Брюссель – 2008-йис) – 3-чка; Россиядин чемпионат (Анапа – 2008-йис) – 1-чка; ветеранрин арада дзюдодай Европадин чемпионат (Прага – 2009-йис) – 1-чка; дзюдодай Европадин кубок патал (Прага – 2008-йис) – 1-чка.
И мукьвара дзюдодин Международный Федерациядин къаюмвилик кваз дзюдодай мастеррин арада кьиле фейи дуьньядин сад лагьай официальный чемпионатдай Россиядин хкягънавай командадин составдик кваз женгиниз экъечIай чи машгьур спортсмен ва тренер Къурбанов Тельман гимишдин медаль гваз хтанва. Алай йисуз вичин уьмуьрдин 40 – гатфар къаршиламишзавай чи машгьур пагьливандихъ – Шарвилидин неведихъ – чаз чандик мягькем сагъвал, яргъал уьмуьр, хзанда бахт, берекат, вичихъ ва адан тербиятчийрихъ спортда мадни еке агалкьунар хьана кIанзава.