Сулейман-Стальский район Республики Дагестан
www.old.suleiman-stalskiy.ru

Халкьдин Игит алхишзава шиирра

                                        САЖИДИН
Шарвили
Тамашзава гъетер кьакьан цаварай
Лезги халкьдиз кьве паталди пай хьайи.
Шалбуз дагъни аватнава ахварай.
Дерт кьве патал пайиз, рикIин цIай хьайи.
Къе виридан вил вал ала, Шарвили!

Есирвиле гьатнава муьгъ «къизилдин».
Самур вацIун тIварни гила «чай» хьайи.     
Къагьриман хва, чи асилдин, несилдин,
Гьар са чIавуз эверайдаз «гьай» хьайи,
Къе виридан вил ала вал, Шарвили!

РикI пад жезва, рагъ экъечIиз, акIизва.
Лезги чилин дерт аваз вай-зай хьайи.
Самурдин там цихъ къаних яз рекьизва,
Кутуг тавур кьисметдикай пай хьайи,
Къе виридан вил вал ала, Шарвили!

                                   АБИДИН КАМИЛОВ
Ша фин пудра КIелед хивяй  эвериз
  
Кьвепелеган, Кьвевар шегьер, Билистан…
Махар хьана чал чи тарих хквезва.
Сир яз ама чаз ви кьисмет, Лезгистан,
Сад дувандихъ, сад Алпандихъ къекъвезва.

Сад дувандихъ, сад Алпандихъ къекъвезва,
Беденда руьгь, кьисметдин тIал рикIеваз,
ЧIехи гъуцар, чи чарх кьулухъ элкъвезва,
Мус  фида чун адалатдин рекьеваз?!

Мус  фида чун адалатдин рекьеваз,
Къенин кIвалах вегьена мад пакадал?
Алакь тийиз, акакь тийиз са карни,
На лугьуда, рикI чразва акадал.

На лугьуда, рикI чразва акадал,
Сагьибар яз, саилар хьиз ава чун.
Са халкь – беден – апайна кьве чкадал,
Хайи чилел мугьманар хьиз ала чун.

Хайи чилел мугьманар хьиз ала чун,
Гьатзавач гьич я гъавурда, - рекье дуьз.
ГьакI хьайила къе ажиз яз ама чун
Вахт атанва эвердай Шарвилидиз.

Вахт атанва эвердай Шарвилидиз –
Лезги чилин къагьриманрин руьгьериз.
Хъижедайвал чи кIвалахар вири дуьз
Ша фин пудра КIелед хивяй эвериз!

               ШАГЬАБУДИН ШАБАТОВ
Шарвили я
Кьве агъзур йис, адалайни пара я,
Анлай инихъ тарихарни  хара я,
Амма ам чаз виридалай(ни)  багьа я.
Вуж я ама? Шарвили я, Шарвили.

Хайи Чили кьунай вичин кIула ам,
Уьтквемвили, гьакIни хвенвай чIала ам,
Дагъ, раг хьанай чапхунчийрин хура ам.
Вуж я ама? Шарвили я, Шарвили.

Женнетдин юкь – квайни квай чIук чил хвейи.
Чарадан мал къакъуд тавур, гъил хвейи.
Фагьумсуз тир къурабайрин кьил хайид
Вуж я ама? Шарвили я, Шарвили.

Ни лугьуда къе лезгияр зирек туш?
ЧIални чил хуьз са чIавузни гьелек туш.
Веси турди «гьарам девлет герек туш»,
Вуж я ама? Шарвили я, Шарвили.

Пудра чна эвердач ваз, Шарвили.
Вун ахварай аватмир, ви кар кьилиз
Акъудиз чун гьазур я, мад гум вилиз
Фий лугьудайд жеч и чилел, Шарвили,

Валай чешне къачузва гьар лезгиди,
Кутаз жедач рехне михьи гуьзгуьдик,
На чун хьиз, чи гележегни экуьник
Кутун патал ялда чна, Шарвили.

Шагьабудин – Шалбуз дагъдин пад хьтин,
Агакьнавай бул бегьердин гад хьтин,
Михьивилиз абукевсер яд хьтин
Ви весийриз вафалу я, Шарвили!

                  ЗУМРИЯТ ШАМСУДИНОВА
ШАРВИЛИДИЗ
Кас – Бубадин гъиле авай ичина
Сад Аллагьди, Шарвили, ви тIвар туна.
Къурбанд  хьурай Сад Аллагьдин  кьадардиз,
Вун халкьна чи лезги  халкьдиз  далу яз:
Садаз хва яз, садаз – стха, халу яз.
Вун гилани чи далудихъ галама,
Асиррилай ви тIвар рикIел алама.
Къавах тарци гьарайнай ваз цававай:
- Кьакьан хьухьа, вун лезгийрин дамах я!
Асланрини гьарайнай ваз тамавай:
- Гужлу хьухьа, вун лезгийрин даях я!
Шарвили, вун чаз Аллагьди гайид я.
Лезги халкьдихъ мад кьегьалар хьайид я.
Зи лезги халкь душманрикай хуьн патал    
Шумудни са Шарвилид(и) я чан гайид я.
Лезги халкьар, чи кьисмет, бахт хуьн патал
Вири сад жен, гьахъвал патал къарагъин!
Шарвилидин руьгьдиз хабар гун патал
Пуд сеферда КIелед хивяй гьарайин!                                                                                                                   
 

Адрес статьи: http://old.suleiman-stalskiy.ru/?com=articles&page=article&id=780