Дагъустандин гидрометцентрдин начальникдин заместитель Абдул Дадашева хабар гузвайвал, июлдин вацра гьавадин температуради юкьван гьисабдалди 23-28 градус тешкилда, дагълух районра 17-21 градус чимивал жеда. Агъуз тир температура, къати марфар вацран сифтегьан 10 юкъуз жеда. Йифен бязи вахтара температура 11-16 градусдал кьван, дагълух районра лагьайтIа 5-I0 градусдал кьван агъуз аватда. Вацран эхиримжи паюна лагьайтIа, гьавадин чимивили дуьзенлухра ва дагъдин ценерив гвай районра 34-39 градус, гьуьлуьн патав гвай районра 30-35 градусар, дагълух районрани 30-33 градус тешкилда. Вацра къвадай къвалрин кьадар алатай йисар фикирдиз къачурла юкьван гьисабдалди кьурдалай са тIимил артух жеда ва абуру республикада санлай кьурла 20-далай 60 миллиметрдал кьван, дагълух районрани 40 далай 100 миллиметрдал кьван тешкилда. Марфарни асул гьисабдалди вацран сифтегьан паюна къвада.
Зулун кьил алай магьсулар кIватI хъувун патал июлдин вацран гьаваяр кьулайбур жеда. Вацран сифте паюна къвадай марфари гьажибугъдайри тан гадаруниз ва бегьер кьуниз хъсан таъсир ийида. Багъларай яр-емишрин фад дигмиш жедай сортарин, гьакIни майвайрин бегьер кIватI хъийидайвал къулай шартIар жеда.
Вацран сифтегьан паюна вацIара ятар гзаф хьайитIани кьвед лагьай паюна абур яваш-яваш элякьда, яд тIимил жеда. Самур ва Гюлгеричай вацIара цин кьадар алатай йисарив гекъигайла и вацра са тIимил гзаф жеда, амма абуру зиянар гунин хаталувал авач.
Санлай кьурла июлдин вацран гьавадин шартIар хуьруьн майишатдин кIвалахар кьиле тухун патал къулайбур жеда.