Сулейман-Стальский район Республики Дагестан
www.old.suleiman-stalskiy.ru

Дявекарар терг хьурай

Малум тирвал, алай йисан августдин вацра Дагъустан Республикадин Конституциядин бинеяр чIурун, адавай вичин азадвилер ва аслу туширвал къакъудун патал адал гьужум авур бандитрин законсуз тешкилнавай дестеяр терг авурдалай инихъ 10 йис тамам жезва. Дагъустандин халкьарин кьисмет гьялзавай и четин макъамда, вилик вахтара хьиз, Дагъустандин вири халкьар, гъвечIидалай чIехидал кьван, чпин дагъвидин намус ва аслу туширвал хуьн патал туьтуьнихъ кьван яракьламиш хьанвай бандитрин- душманрин- аксина женгиниз экъечIна, абур дарбадагъна, абуруз чпин чка чирна.

И йикъара чи махсус корреспондент и лишанлу йикъан вилик 2001- йисалай чи районда кардик квай «Полигон» женгинин гьерекатрин иштиракчияр тир дагъустанвийрин региональный общественный организациядин райондин отделенидин председатель, Чечняда кьиле фейи женгерин гьерекатра тафаватлу хьунай ганвай Жукован тIварунихъ галай медалдин сагьиб Арасханов Алим Масанхановичахъ галаз гуьруьшмиш хьана ва адавай и жигьетдай кьве гаф лугьун тIалабна.
- Гьакъикъатдани «Полигон» региональный общественный организациядин чи райондин отделенидин учетда алай вахтунда 138 кас чи уьлкведин гьар регионра (асул гьисабдалди Чечняда) кьиле фейи женгерин акьунрин иштиракчияр хьайи 138 кас членар ава. Абурукай 10 кас Гьукуматдин женгинин орденринни медалрин ва маса наградайрин сагьибар я. Абурун жергеда женгера хирер ва чеб набут хьанвай, хзанрин яшайишдин гьал четинзавайбурни ава.
Чи учетда гьакI чпин гъуьлер женгера телеф хьайи 3 хендедани ава. Чна мумкинвал хьайила сифте нубатда ахьтинбурал, абурун хзанрал са кьил чIугвазва, чалай алакьдай куьмекар гузва. Гьелбетда, чи мумкинвилер са акьван чIехибур туш.И алай, бейкарвал артух, инсанрин яшайишдин гьал, дережа агъуз аватнавай четин шартIара, ахьтинбуруз куьмекдин гъил яргъи ийидай мергьеметлу инсанар, спонсорарни чахъ, гьайиф хьи, са акьван авач.
Гена чухсагъул лугьуз кIанзава заз чи отделенидин учетда авай вири аскеррин- женгерин иштиракчийрин тIварунихъай муниципальный райондин Кьил Яралиев Имам Музамудиновичаз чаз куьмек яз ЧIехи Гъалибвилин суварин вилик 15 агъзур манат пул чара авур.
Умудзава, Дагъустандал гьужум авур бандитрин дестеяр кукIварайдалай инихъ 10 йис тамам хьунин и лишанлу вакъиадин вилик чаз республикадайни куьмекдин гъил яргъи ийида, чун- чи чIехи Ватандин садвал, азадвал ва аслу туширвал хуьн патал, чанарни гьайиф татана душмандин хура акъвазайбур- саймишда, чна чи гьакъиндай къайгъударвал ийизвайбур авайди гьисс ийида.
Къуй, чи ислягь уьмуьр чIуриз алахъзавай, чи арайра амай, доллардикай вик хьана, чи душманрин чIуру къастар кьилиз акъудиз алахъзавай, бязи имансузар, мунафикьарни терг хьана, чи гзаф дявеяр, азиятар акунвай хайи чилел хушбахт вахтар ва секин уьмуьр хтурай! Дявекарар чеб гьина аватIани, терг хьурай! Амин!
 

Адрес статьи: http://old.suleiman-stalskiy.ru/?com=articles&page=article&id=751