Дагъустанда нубатдин мусибат арадал атана. И сеферда секин Сулейман-Стальский районда. Дербентдин юбилей къейддалди са югъ амаз, 18-сентябрдиз, райондин тамарай 5 гъуьрчехъандин мейитар жагъана.
27 йис хьанвай Ламет Ибрагьимов ва Гьажимет Юркъулиев, гьак1ни 30 йис хьанвай Закидин Метханов тахсиркарри ц1велериз гуьлле гана кьена. Идалай вилик абуру гъуьрчехъанрин гъилер кут1унна. Са т1имил геж Гьезерхуьруьн патавай полицейскийриз 52 йис хьанвай Надир Дадашеван ва 46 йис хьанвай Ямудин Тагьирован мейитар жагъана. Абурун кьилериз ва хуруйриз гуьлле ганвай.
Телеф хьайибуру Хтунрин хуьруьн патав гъуьрч ийизвай. Фикирзавайвал, абур Ясир лак1аб алай Гьасан Абдуллаев кьиле авай «Кьиблепатан» бандадин членри яна кьена. Малум тирвал, бандадин членрикай 3 касди ИГИЛ-дин жергейра аваз женг ч1угуна, ахпа абур Дагъустандиз хтана.
Арадал атай мусибатдихъ галаз алакъалу яз Кьасумхуьруьн центрадал администрациядин дараматдин патав 25-сентябрдиз райондин администрацияди ихтияр ганвай агьалийрин митинг хьана. Ана къайдаяр хуьдайбурун блокди, райондин агьалийри, яна кьейибурун мукьва-кьилийри ва райондин администрацияди иштиракна.
Мусибатдихъ галаз алакъалу яз Сулейман-Стальский райондин администрациядин кьил Нариман Абдулмуталибов чкадин агьалийрихъ элкъвена рахана, адан рахунрин текст дегишвилер кухтун тавуна гузва.
-Эхиримжи йисара властдин вири органри тади гьалда ва нетижалу гьерекатар кьабулуналди международный терроризмдиз чи уьлкведа зурба ягъунар кьуна. Гьа са вахтунда ара-бир районда, республикада ва уьлкведа гьалар къайдадикай хкудунин мураддалди террористри чпин экъеч1унар давамарзава. Нетижада ихьтин крарин къурбандар полицейскияр ва ислягь агьалияр жезва. Аквазвайвал, террористри, экстремистри, абуруз куьмек гузвайбуру районда гьалар къайдадикай хкудун патал чпин гьерекатар давамарзава.
Садазни сир туш, чи районда чкадин агьалийрин чинебан бандитрин к1ерет1ар арадал атанва. Абурун гьисабдай бязибуру Сирияда женгерин гьерекатра иштиракна. Алай йисуз районда пуд сеферда террориствилиз акси серенжемар кьиле тухвана. Нетижада законсуз яракьлу дестейрин кьве иштиракчи тергна, яракьар авай чка, недай суьрсет ва яракьар авай складар, боевикар акъвазнавай чкаяр жагъана.
Алай йисан гатуз чи районда еке бедбахтвал арадал атун мумкин тир. Эгер къайдаяр хуьдай органри Кьулан Ст1алдилай террористриз куьмек гузвай сада гьазурнавай хъиткьинардай шей жагъур тавунайт1а, ва ам хъиткьинарунин вилик пад кьуначирт1а, еке бедбахтвал арадал къведай.
И мукьвара бандитар чи са чиновникдин, гьак1ни райондин куьчейра патрулар яз къекъвезвай полицейскийрин чандиз къаст ийизни алахъна. А ч1авуз, бахтунай хьиз, къурбандар арадал атанач. Ингье алатай гьафтеда чи районда еке бедбахтвал арадал атана. Кьве суткадин вахтунда райондин тамарай гуьлле алай яракьдай яна чкадин 5 агьалидин мейитар жагъана. Чун и тахсиркарвилерихъ галаз таниш жезва ва бедбахтвал анжах чи мукьва-кьилидаз ва я дустуниз талукьди хьайила чак хъел акатзава. Чарадан бедбахтвал жедайди туш эхир, бедбахтвал – им вириданди, умумиди я. Пакамаз чакайни са кас яна кьин мумкин я, гьатта дуьшуьшдин гуьлледини ва я бомбадин к1усунини.
Гьавиляй чи виридан гьерекатар чи кьилелай терроризм терг авунихъ элкъуьрнавайбур хьун лазим я. Им анжах са къайдаяр хуьдай органрин везифа туш, им чи виридан гражданвилин буржи я.
Сулейман-Стальский райондин агьалийри терроризм ва экстремизм пислемишзава. Райондин агьалийри райондин, республикадин ва ихтиярар хуьдай органрин руководствойрихъ галаз санал терроризмдихъ галаз женг ч1угунин карда рейсадвал къалурзава.
Амма районда чпин мукьва-кьилияр тир экстремистар, террористар, ИГИЛ-дин терефдал алаз женг ч1угвазвайбур к1евирзавайбурни ава. Ихьтин инсанрин ягьсузвилихъ сергьят авач. Чпин рухваяр са тахсирни квачир инсанар яна кьинин рекьел элеч1навайди чиз-чиз, абур кисна ацукьнава, лагьана к1анда хьи, абур чебни законсуз гьерекатрин ищтиракчияр жезва, бязи вахтара ихьтин крар ийидайбуруз активнидаказ куьмекарни гузва. Чна чпи бандитрин, террористрин интересар хуьзвай, абурун террориствилин гьерекатри зиянар гайибурун хажалатдиз са фикирни тагузвай мукьва-кьилияр пислемишзава.
Гьар са террористдихъ галаз, а террористриз куьмек гузвайбур, мукьва-кьилиярни кваз, ихтилат куьруьди хьун лазим я. Эгер абуру яракьар хкана вахкайт1а ва чпи авур тахсиркарвилер гуьгьуьллувилелди хиве кьурт1а, абуруз судди талукь тир жаза гуда, эгер абуру и кар тавурт1а, абурни амай вири террористар хьиз тергда. За райондин вири имамриз ва жергедин мусурманриз чи республикада инсанар яна кьейи дуьшуьшар лап кьет1идаказ пислемишуниз, залан гунагькарвилерал ва эдебсуз к1валахрал эхир эцигуниз эвер гузва. Райондин жегьилри Сирияда кьиле физвай яракьлу чуьруькда иштирак тавуниз эвер гузва.
Районда исламдин къанунар хуьз к1анзавайбур патал вири шарт1ар яратмишнава. Гзаф хуьрера миск1инар, са бязи чкайра кап1дай к1валер ачухнава. Кьуръан ва адан таржумаяр къадагъа авунвач. Диндин тешкилатриз райондин телеканалда эфирдин вахт ганва. Райондин агъалийри, миск1инриз къвезвайбуру имамар чпи хкязава ва абуруз садани вуж хкягъун лазим ят1а къалурзавач. Райондин мусурманри диндин суварар гьамиша къейдзава, азаддиз Ислам вяззава, миск1инра кп1арзава, Рамазандин вацра сивер хуьзва, Пак Меккедиз гьаждал рекье гьатзава. Гьавиляй мусурманар яна рекьизвайбуруз са гьихьтин ят1ани диндин фикиррик чуьнуьх хьана инсанар яна рекьидай ихтияр авач.
Чна чпин къуллугъдин мажбурнамаяр кьилиз акъуддайла, вик1егьвал ва жуьрэтлувал къалурунай къуват гъиле авай къурулушдин къуллугъчийриз чухсагъул лугьузва. Абур чун патал чешне хьун лазим я.Чи районэгьлияр Россиядин Игит Радим Халикьова, Вик1егьвиляй ордендин сагьиб Роберт Къазагьмедова терроризмдихъ ва экстремизмдихъ галаз женг ч1угуналди чпин чанар гана. Абур чи халкьдин ислягь гележег хуьн паталди телеф хьана. Абурун вик1егьвал себеб яз чун къе ислягь цавун к1аник яшамиш жезва, чна чи район вилик тухузва, бахтлу гележег туьк1уьрзава.
За умуд кутазва хьи, райондин чкадин органри, къайдаяр хуьдай органри, федеральный къурулушни галаз, чи чилелай терроризм ва экстремизм дибдай тергда. Къайдаяр хуьдай органрихъ галаз санал терроризмдин ва экстремизмдин вилик пад кьада. Чи гележег – чи аялар я. Абурун гележег чун сад хьана ва са фикирдал атуна ава. Чун я ина яшамиш жезвайбур, к1валахзавайбур ва яратмишзавайбур.
Чи чилел ислягьвал ва цуьк акъудун патал чна чалай аслу тир вири к1валахар ийида!
