Гьар са чилихъ ам машгьурдай кьакьан дагълар, гурлу вацIар, чар булахар жедайди хьиз, гьар са халкьдихъ адан ад, намусдин таж хьиз, вине кьуна хуьзвай чIехи тIварар, зурба бажарагъарни жеда. Лезги халкьдихъ, лезги чилихъни вичин кьетIен лишанар (яржар), руьгьдин мягькем даяхар авачиз туш. И жигьетдай алай аямдин лезги шииратдин нурлу гъетерикай сад тир шаир Арбен Къардаша лезгийрин «Шарвили» къагьриманвилин эпосдиз талукьарнавай вичин са макъалада икI кхьизва: «Лезги халкьдиз руьгьдин рузи ва къуват гузвай пуд ярж (символ) ава: Шалбуз дагъ, Кьулан вацI ва Шарвили. Абур чи миллетдин пуд даях я. Пуд кIвач квай куьсруь гьинал эцигайтIани ярх жедач. Чи халкьдивай тарихдин мичIи даркалрайни буьркьуь уламрай вичин чIални, чилни руьгьдин садвал хвена экъечIиз хьунин сирни гьа и пуд «кIваче» ава жеди.
Эхь, шаирди къейд ийизвай и пуд даяхни бинелубур ва эбедибур я. Амма гьар са халкьдин тарих арадал гъизвайбур ва ам гележегдин несилрал агакьарзавайбур адан кьегьал рухваяр я. Ахьтин къагьриман рухвайри, хайи халкьдиз намуслувилелди къуллугъ авуналди, чпин тIварар гьеле чпел чан аламазни машгьурда, эбеди ийида. Лезгийрин къагьриманвилин эпос «Шарвили» арадал хкун патал еке зегьметар чIугур шаирар тир регьметлу Забит Ризванова, Дагъустандин халкьдин шаир Байрам Салимова, «Шарвили» эпосдин сувар кьиле тухунин инициаторрикай сад тир ва 2000-йисалай инихъ республикадин дережада аваз кьиле тухузвай и суварин тешкиллувилин комитетдин председателвилин жавабдар кIвалах тамамарзавай «Дербент шегьер» шегьердин округдин Кьил Имам Музамудинович Яралиева ва гьакIни «Шарвили» эпос лезги чIалай урус чIалаз таржума авур Ризванов Ризван Забитовича чпин тIварар чи халкьдин тарихда эбеди авунва лагьайтIа, зун гъалатI жедач.